چھوٹے بھائی کی بیوی اور بیٹے کو ریٹائرڈ فوجی بھائی نے قتل کرڈالا۔ضلع شمالی کینرا کے انکولہ میں پیش آئی خوفناک واردات
بھٹکل 28/جولائی (ایس او نیوز) ضلع شمالی کینرا کے انکولہ میں مٹھا کیری علاقے میں ایک سابق فوجی نے اپنے چھوٹے بھائی کی بیوی اور بیٹے کو ڈبل بیرل بندوق سے گولی چلاکر ہلاک کرنے کی واردات سنیچر کی شام کو پیش آئی۔
ذرائع سے ملی اطلاع کے مطابق مٹھاکیری کے ایک دولتمند گھرانے سے تعلق رکھنے والے وظیفہ یاب فوجی سبرایا عرف اجیت اچھیوت پربھو(۴۴سال) نے یہ قتل کی واردات انجام دی ہے۔ اس کے بعد وہ گھر سے باہر آنگن میں کھڑے ہوکر چلّانے لگا کہ میں نے دونوں کو قتل کرڈالا تم لوگ مجھے پکڑ لو۔ آس پاس جمع ہونے والے لوگ اس کے ہاتھ میں بندوق دیکھ کر سہم گئے اور کوئی بھی اس کے قریب نہیں آیا۔ پھر اس نے بندوق دوسری طرف پھینک دی تو لوگ گھر کی طرف آگے بڑھے اور خون میں لت پت لاشیں دیکھ کرکانپ اٹھے۔اجیت نے یہ خونریز واردات کیوں انجام دی ہے اس کے بارے میں ابھی کوئی تفصیل معلوم نہیں ہوئی ہے۔
سابق فوجی اجیت کے ہاتھوں قتل ہونے والوں کی شناخت اس کے بھائی امیت کے بیٹے انوج پربھو(۸سال) اور امیت کی بیوی میدھا پربھوکے طور پر کی گئی ہے۔ بندوق کی گولی لگنے سے انوج نے موقع پر ہی دم توڑ دیا تھا جبکہ میدھا کو انکولہ کے آریااسپتال میں طبی امداد کے بعد منی پال منتقل کرنے کی کوشش کی گئی مگرہوناور کے قریب پہنچتے ہی اس کی بھی موت واقع ہوگئی۔
بتایا گیا ہے کہ ابیت اور امیت پربھو دونوں بھائی اپنے موروثی گھر میں رہتے تھے۔ سابق فوجی اجیت کے بھی بیوی بچے تھے، لیکن کسی وجہ سے وہ لوگ اس کے ساتھ نہیں رہتے تھے۔ اس سے اجیت ذہنی تناؤ میں مبتلا تھا۔اور گھر میں بار بار جھگڑے اور ہنگامے کھڑے کرتا تھا۔سنیچر کے دن اس کاچھوٹا بھائی امیت جب گواکے لئے روانہ ہوا تو اس کی بیوی اور لڑکے کے علاوہ اجیت اور امیت کی ماں گھر پر رہ گئے تھے۔ اس موقع پر پتہ نہیں کیا بات ہوئی کہ گھر کے پہلے منزلے پر تنہا قیام کرنے والا اجیت نیچے اتر آیا اور اجیت کے گھرکی گھنٹی بجائی۔ جیسے ہی میدھا نے دروازہ کھولا تو اس نے ڈبل بیرل بندوق سے گولیاں داغ دیں۔اس حملے سے معصوم انوج کے جسم کے چیتھڑے اڑ گئے۔جبکہ میدھا خون میں لت پت زمین پر گر کر تڑپنے لگی تو اجیت دوڑ کر گھر سے باہر آگیا اور پڑوسیوں کو آواز دے کر ان دونوں کو بچانے کی درخواست کرنے لگا۔
معلوم ہوا ہے کہ اجیت جب گولیاں داغ رہا تھا تو اس کی ماں سلوچنا پربھو کمرے کے اندر سو رہی تھی، اس وجہ سے وہ گولیوں کی زد میں آنے سے بچ گئی ہے۔حالانکہ اس دوہرے قتل کا اصلی سبب معلوم نہیں ہوا ہے، لیکن خبر یہ بھی ہے کہ ایک ہفتے پہلے ہی اجیت نے اپنے بھائی امیت کو دھمکی دی تھی کہ وہ اس کی بیوی اور بیٹے کو مارڈالے گا۔ لیکن امیت نے یہ سوچ کر خاموشی اختیار کرلی تھی کہ شاید اجیت نے نشے کی حالت میں یوں ہی دھمکی دی ہوگی۔
پولیس نے ملزم اجیت کو گرفتار کرلیا ہے اور مزید تحقیقات جاری ہے۔ ضلع ایس پی ونائیک پاٹل، ڈی وائی ایس پی شنکر ماریہال، سرکل انسپکٹر پرمود کمار اور سب انسپکٹر شریدھر نے جائے واردات پر پہنچ کر معائنہ کیا ہے۔