ای وی ایم میں کوئی گڑ بڑی ممکن نہیں: بی ای ایل ایم وی گوتم
بنگلورو،2؍ جون (ایس او نیوز؍یو این آئی) الیکٹرونک ووٹنگ مشینوں (ای وی ایم) میں گڑبڑی کے سلسلے میں اپوزیشن پارٹیوں کے ظاہر کئے گئے خدشات کے درمیان بھارت الیکٹرونک لمیٹیڈ (بی ای ایل) کے صدر اور منیجنگ ڈائریکٹر ایم وی گوتم نے ہفتے کے روز کہا کہ بی ای ایل کی جانب سے بنائی گئی ای وی ایم اور وی وی پیٹ مکمل طور پر قابل اعتماد ہیں اور ان سے متعلق ظاہر کئے جارہے سارے شبہات بے بنیاد ہیں۔ مسٹر گوتم نے یہاں سالانہ پریس کانفرنس میں کہا کہ ای وی ایم میں گڑبڑی کروائے جانے کے الزام لگتے تھے جو درست نہیں ہیں۔ ای وی ایم کا جدید ماڈل ایم۔3 پوری طرح قابل اعتماد ہے اور ان میں گڑبڑی نہیں کروائی جاسکتی۔ اس مسئلے پر اٹھنے والا طوفان اب تھم گیا ہے ۔انہوں نے یہاں سالانہ پریس کانفرنس میں کہا کہ ''بی ای ایل نے 10 لاکھ سے زائد ای وی ایم سپلائی کی ہیں۔ ہر دن 18 سے 20 ٹرکوں میں ای وی ایم اور وی وی پیٹ یہاں سے بھیجے گئے ''۔انہوں نے کہا کہ بی ای ایل 1990 سے ای وی ایم تیار کررہی ہے ۔ حال ہی میں منعقد ہوئے لوک سبھا انتخابات میں بی ای ایل نے 542 میں سے 400 انتخابی حلقوں کے لئے ای وی ایم سپلائی کی تھیں۔ بی ای ایل اب تک 10 لاکھ سے زائد ای وی ایم بنا چکی ہے ۔ پہلی ای وی ایم کا ماڈل ایم۔1 تھا، دوسرا ایم۔2 اور اب کمپنی جدید ترین ماڈل ایم۔3 بنا رہی ہے ۔ کمپنی نے ایم۔2 مشینوں کے اپ گریڈیشن کے لئے بھی کام شروع کیا ہے ۔انہوں نے کہا کہ ''میں ای وی ایم پر اعتماد سے متعلق سبھی شبہات دور کرنا چاہتا ہوں۔ کئی ممالک کے افسران بھی ای وی ایم کا تجربہ کرنے آئے تھے اور وہ ان کے طریقہ کار سے کافی متاثر ہوئے ۔ کمپنی کو الیکشن کمیشن سے 2600 کروڑ روپے کے آرڈر ملے تھے ۔ اب کمیشن کا کوئی آرڈر التوا میں نہیں ہے ۔ ریاستی سرکاروں کے ایم ۔3 زمرے کی ای وی ایم بنانے کے آرڈر مل رہے ہیں۔ یہ آرڈر 100 کروڑ روپے سے زائد کے ہیں۔