یورپین ایجنسی کا پاکستانی طیاروں کی برطانیہ اور یورپ پرواز پر پابندی برقرار رکھنے کا فیصلہ

Source: S.O. News Service | By S O News | Published on 5th December 2020, 7:28 PM | عالمی خبریں |

 اسلام آباد، ۴/دسمبر(آئی این ایس انڈیا)شہری ہوا بازی سے متعلق یورپ کے ادارے 'یورپین یونین ایوی ایشن سیفٹی ایجنسی' نے پاکستان انٹرنیشنل ایئر لائنز (پی آئی اے) سمیت پاکستانی طیاروں کی برطانیہ اور یورپ میں پروازوں پر عائد پابندی برقرار رکھنے کا فیصلہ کیا ہے۔

پی آئی اے کے چیف ایگزیکٹو افسر (سی ای او) ارشد ملک کا کہنا ہے کہ کرونا وائرس کی وجہ سے کچھ مسائل ہیں۔ لیکن جلد ان مسائل پر قابو پا لیا جائے گا۔

یورپی کمشن ڈائریکٹوریٹ جنرل فار موبیلٹی اینڈ ٹرانسپورٹ نے ڈائریکٹر جنرل سول ایوی ایشن پاکستان کو بذریعہ مراسلہ آگاہ کیا ہے کہ پائلٹس کے مشکوک لائسنس اور جعلی ڈگریوں کے معاملے پر پاکستان کے طیاروں کی برطانیہ اور یورپ جانے والی پروازوں پر پابندی برقرار رہے گی۔

پاکستان کی سول ایوی ایشن اتھارٹی کو آگاہ کیا گیا ہے کہ یورپی کمشن کے 17 اور 18 نومبر کو برسلز میں ہونے والے اجلاس میں پابندی برقرار رکھنے کا فیصلہ کیا گیا۔

مراسلے میں پاکستان کو کچھ اقدامات بھی تجویز کیے گئے ہیں جن کے مطابق پاکستان کی ایوی ایشن اتھارٹی کو پائلٹس لائسنس کے طریقہ کار کو شفاف اور فول پروف بنانے کے لیے کہا گیا ہے۔

مراسلے میں یہ بھی کہا گیا ہے کہ پاکستان سول ایوی ایشن اتھارٹی یورپی یونین کے کمشن کو مطمئن نہیں کر سکی۔ اسے سیفٹی اقدامات مزید بہتر بنانے ہوں گے۔

مراسلے میں تسلیم کیا گیا ہے کہ پاکستان کی سی اے اے تحفظات کو دور کرنے کے لیے اقدامات کر رہی ہے۔ تاہم اس میں مزید بہتری کی ضرورت ہے۔

پاکستان انٹرنیشنل ایئر لائنز (پی آئی اے) کے سی ای او ارشد ملک کہتے ہیں کہ لائسنسنگ کے ایشوز کی وجہ سے زیادہ مسائل کا سامنا کرنا پڑا۔ فلائٹ سیفٹی سے متعلق مزید اقدامات کرنے ہوں گے۔

اسلام آباد میں ایک تقریب سے خطاب میں ارشد ملک کا کہنا تھا کہ کرونا کی وجہ سے کچھ مسائل ہیں لیکن پی آئی اے جلد عروج حاصل کرے گی۔

ارشد ملک کا کہنا تھا کہ پی آئی اے آئندہ چند برس میں منافع کمانے والا ادارہ ہو گا۔ نجی شعبے کے تعاون سے پی آئی اے کے نقصان کو کم کرنے کی کوشش کر رہے ہیں۔ کرونا کی صورتِ حال میں بھی عوام کو ریلیف دینے کے لیے پی آئی اے کے کرائے کم کیے گئے ہیں۔

اس بارے میں ایوی ایشن صحافی طاہر عمران کا کہنا ہے کہ حکومت اور انتظامیہ کے اقدامات سے معطلی جلد ختم ہونے کی امید ہے۔ لیکن پاکستان کے وزیرِ ہوا بازی غلام سرور خان کا پائلٹوں کے جعلی لائسنسوں سے متعلق بیان اب تک پاکستان کے لیے مسئلہ بنا ہوا ہے۔

طاہر عمران نے کہا کہ ایاٹا اور دیگر سیفٹی ایجنسیوں کی اجازت کے بعد پاکستان انٹرنیشنل ایئر لائنز اس وقت ایئر کارگو پر زیادہ کام کر رہی ہے اور اس مقصد کے لیے مختلف سامان سیٹوں پر رکھ کر ایک جگہ سے دوسری جگہ منتقل کیا جا رہا ہے۔ اس سے ایئر لائن کا نقصان کم ہو گا۔

ان کا کہنا تھا کہ پاکستان نے اب سیفٹی کے حوالے سے سافٹ وئیر پر تمام معلومات فراہم کرنے کا سلسلہ شروع کر دیا ہے جس کا سیفٹی آڈٹ ہونا تھا۔ لیکن پاکستان کے پائلٹس کے جعلی لائسنسوں کا معاملہ اب تک حل نہیں ہو سکا ہے۔

ان کے بقول مختلف ادارے پاکستان کو آگاہ کر رہے ہیں کہ اگر درست اقدامات نہ کیے گئے تو پاکستان ایوی ایشن کے حوالے سے شدید مشکلات کا شکار ہو سکتا ہے۔

واضح رہے کہ اس وقت پاکستان کی نجی ایئر لائنز بھی اپنے آپریشنز کو وسعت دینا چاہتی ہیں اور ان کے نئے جہاز بھی آ رہے ہیں۔ لیکن وہ صرف ان مسائل کی وجہ سے اپنی بین الاقوامی پروازیں آپریٹ نہیں کر پا رہیں جس سے مسائل بڑھ رہے ہیں۔

پاکستان کے وفاقی وزیر برائے ہوا بازی غلام سرور خان نے 24 جون کو کہا تھا کہ 860 پائلٹس میں سے 262 ایسے پائے گئے جن کی جگہ کسی اور نے امتحان دیا تھا۔ جس کے بعد 30 جون کو یورپین یونین کی ایئر سیفٹی ایجنسی نے پاکستان ایئر لائن کا یورپی ممالک کے لیے فضائی آپریشن کا اجازت نامہ 6 ماہ کے لیے معطل کر دیا تھا۔ اور پی آئی اے کی یورپ جانے والی تمام پروازیں منسوخ کر دی گئی تھیں۔

ایک نظر اس پر بھی

ماسکو کنسرٹ ہال حملے میں 143ہلاکتیں

روس کے دارالحکومت ماسکو میں ایک کنسرٹ ہال پر جمعہ کو ہونے والے حملے میں مرنے والوں کی تعداد بڑھ کر 143 ہوگئی ہے جبکہ 100 سے زائد افراد زخمی ہیں۔روس کی تحقیقاتی کمیٹی نے ہفتے کے روز یہ اطلاع دی۔ کمیٹی نے کہا کہ ایمرجنسی سروسز ماسکو اوبلاست میں کروکس سٹی ہال، دہشت گردانہ حملے کی جگہ ...

80 ہزار افراد نے مسجد اقصیٰ میں نماز جمعہ ادا کی

قابض اسرائیلی فوجوں  کی سختی کے باوجود رواں  سال رمضان کے پہلے جمعہ کو ۸۰؍ ہزار مسلمانوں   نے بیت المقدس میں  پہنچ کر نماز جمعہ ادا کی۔ قدس نیوز نیٹورک نے جو ویڈیوشیئرکئے ہیں  میں  دیکھا جاسکتاہے کہ جوق در جوق مغربی کنارہ، راملہ اور دیگر علاقوں  سے فلسطینی شہری پیدل اور بسوں ...

شہریت ترمیمی قانون پر امریکہ نے بھی اپنی تشویش ظاہر کردی

امریکہ اور نے ہندوستان کے متنازعہ شہریت ترمیمی قانون پر عدم تحفظات کا اظہار کردیا۔ امریکی محکمہ خارجہ کے ترجمان نے بیان میں کہا کہ ہندوستان میں شہریت کے متنازعہ ترمیمی قانون کے نفاذ پر تشویش ہے۔ ایکٹ کے نافذ ہونے کے بعد صورتحال کا بغور جائزہ لے رہے ہیں۔

غزہ پر اسرائیلی حملوں کے سبب جان گنوانے والے فلسطینیوں کی تعداد 31272 ہوئی

غزہ پٹی پر جاری اسرائیلی حملوں سے فلسطینیوں کی ہلاکتوں کی تعداد 31272 ہو گئی ہے۔ غزہ میں قائم وزارت صحت نے بدھ کو یہ اطلاع دی۔ وزارت نے ایک بیان میں کہا کہ اسرائیلی فورسز نے گزشتہ 24 گھنٹوں کے دوران 88 فلسطینیوں کو قتل اور 135 دیگر کو زخمی کیا، جس سے گزشتہ اکتوبر میں اسرائیل اور حماس ...

غزہ میں امداد کیلئے قطار میں منتظر افراد کو پھر نشانہ بنایا گیا، 11 شہید

  انسانیت کی تمام حدوں  کو پار کرتے ہوئے اسرائیلی فوجوں  نے بدھ کو پھر بھکمری کے شکار ان پریشان حال لوگوں  کو نشانہ بنایا جو اپنے بچوں  کی پیٹ کی آگ بجھانے کیلئے امداد حاصل کرنے کے مقصد سے قطار میں  لگے ہوئے تھے۔ بدھ کے اس حملے میں  ۱۱؍ افراد کی شہادت کی تصدیق ہوئی ہے جس کے بعد ...

انڈونیشیا میں سیلاب اور چٹان کھسکنے سے تباہی، 19 افراد ہلاک ،متعدد زخمی

انڈونیشیا کے جزیرے سماترا میں مسلسل بارش نے سیلاب اور چٹان کھسکنے سے بڑے پیمانے پرتباہی ہوئی ہے۔ اس دوران 5سے زائد گھر دب گئے۔ مکانات کے ملبے سے12 لاشیں نکالی گئیں اور 7افراد کو شدید زخمی حالت میں اسپتال پہنچایا گیا۔ ملبے سے دیگر 6 افراد کو بحفاظت نکالا گیا جبکہ5 افراد اب تک ...