ہوناور تعلقہ کے ولکی میں جامعہ نسواں ،مدرسہ سیدہ فاطمةالزھراءؓ میں شعبہ حفظ کا قیام ،۳۶ طالبات سے آغاز
بھٹکل 18 جنوری (ایس او نیوز) پڑوسی تعلقہ ہوناور کے ولکی قصبہ میں گذشتہ روزمدرسہ سیدہ فاطمةالزھراءؓ میں خواتین کے لئے شعبہ حفظ کا قیام عمل میں آیا اور 36 طالبات کے ساتھ اس کا باقاعدہ آغاز کیا گیا۔اس موقع پر مدرسہ کے اندرونی حصہ میں خواتین کی مجلس میں طالبات نے بہترین و خوبصورت انداز میں حمد،نعت و تقاریر سنا کر سامعین کو محظوظ کیا۔
ولکی سے جناب مختار احمد فخرو ولکوی نے بتایا کہ ایک دھائی سے ولکی میں نوجوانوں کی تحریک؍ مدارس سے قائم "ادارہ التعلیم" کے زیر اہتمام دینی مدارس کے کئی شعبے پروان چڑھ رہے ہیں، جہاں لڑکوں کی عالمیت کی تعلیم اور شعبہ حفظ وغیرہ مسجد کے بالائے حصہ میں چل رہی ہیں جس کے ذریعے کئی طلبہ حافظ قران اور عالمیت وغیرہ مکمل کرچکے ہیں، طالبات کے لئے مدرسہ فاطمۃ الزھرا میں عالمیت کا کورس پہلے سے تھا ، حفظ قران کی شروعات اب جاکر کی گئی ہے۔ افتتاحی تقریب کے موقع پر تقریبا پورے ولکی سے خواتین شریک رہیں۔
مختار فخرو کی دی گئی اطلاع کے مطابق تقریب میں فضائل قرآن و حفاظ کرام کے موضوع پر بیانات دئے گئے اور چند روز پہلے مدرسہ کی طالبات کے درمیان جو تقریری مقابلے منعقد ہوئے تھے اُس میں اول ، دوم اور سوم آنے والوں کو پھر ایک بار اپنی صلاحیتوں کا مظاہرہ کرنے کا موقع فراہم کیا گیا۔ تقریب میں انہیں انعامات سے بھی نوازا گیا۔
مہمان خصوصی کے طور پر جناب حافظ شریف صاحب موجود تھے جنہوں نے کلیدی خطاب فرمایا۔ جناب داولجی محی الدین صاحب نے صدارت کی۔ مختار فخرو نے بتایا کہ لڑکوں کے لئے مدرسہ کی تعمیر زیر منصوبہ ہے،مگر مالی کمزوری کی وجہ سے اب تک تعطل کا شکار ہے۔مزید بتایا کہ ولکی کے آس پاس میں پچاس سے زائد مسلم بستیا ں ہیں لیکن یہاں کوئی دینی درس گاہ قیام و طعام کے ساتھ نہیں ہیں۔
