کیرالہ سے داخل ہوتے ہوئے ساحلی کرناٹکا میں مانسون نے دی دستک۔ کرناٹکا میں پوری طرح مانسون شروع ہونے میں ہوسکتی ہے تاخیر
بھٹکل 5/جون (ایس او نیوز) حسب معمول جون کے آغاز میں ہی مانسون نے کیرالہ میں داخلہ لیااور پھر وہاں سے ہوتے ہوئے دودن پہلے ساحلی کرناٹکا میں دستک دی۔ جس کے ساتھ ہی مینگلور، اُڈپی، بھٹکل، کمٹہ اور کاروار وغیرہ علاقوں میں موسلادھار بارش، طوفانی ہواؤں اور بادلوں کی گھن گھرج کے ساتھ مانسون نے اپنی آمد کا نقارہ بجایا۔
محکمہ موسمیات نے پیش گوئی کی ہے کہ چونکہ پچھلے دو دنوں سے کیرالہ میں مانسون تھوڑا کمزور پڑ گیا ہے اس لئے کرناٹکا میں پوری طرح مانسون کی بارش شروع ہونے میں تھوڑی سی تاخیر ہوسکتی ہے۔فی الحال جنوبی کینرا، اڈپی اور شمالی کینرا میں برسات ہوئی ہے اور 7 جون سے 9 جون کے درمیان بھاری مقدار میں برسات ہونے کی توقع کی جارہی ہے۔
ایک طرف مانسون کی آمد سے کسانوں اور عام لوگوں کو راحت ملتی ہے تود وسری طرف سمندری ساحل سے قریب ترین علاقوں میں بسنے والوں کے لئے تشویش بڑھ جاتی ہے۔ ہر سال طوفان او رسمندری کٹاؤ سے درپیش خطرات کی فکرساحلی علاقوں میں خوف و ہراس کا ماحول پیدا کرتی ہے۔اور امسال بھی حالات میں کوئی خاص تبدیلی نہیں آئی ہے۔