بھٹکل: پولس کی مدد درکار ہوتو اب سو نمبر ڈائل کرنے کے بجائے 112 ڈائل کریں؛ ڈی وائی ایس پی کے ہاتھوں پانچ سواریوں کا افتتاح
بھٹکل 2 فروری (ایس او نیوز) اگر آپ کو پولس کی مدد کی ضرورت ہے، کوئی ایمرجنسی ہے، تو اب 100 نمبر ڈائل کرنے کے بجائے، 112 نمبر ڈائل کرنا ہوگا، آپ 112 پر مسیج بھی روانہ کرسکتے ہیں اور ضروری ہوا تو [email protected] پر ای میل بھی کرسکتے ہیں۔اطلاع موصول ہوتے ہی پولس کی طرف سے قریب میں موجود ERRS یعنی ایمرجنسی ریسپاونس سپورٹ کی گاڑی فوری مدد کے لئے پہنچ جائے گی۔ کہیں آگ لگنے کا واقعہ پیش آیا ہو یا کوئی روڈ ایکسیڈنٹ ہوا ہو تو بھی فائر بریگیڈ کو اور پولس کو الگ سے خبر دینے کی ضرورت نہیں ہوگی صرف 112 نمبر ڈائل کرکے واقعےکی جانکاری دینا کافی ہوجائے گا۔
بھٹکل ڈی وائی ایس پی بیلی ایپّا نے بھٹکل سب ڈیویژن کے لئے پانچ جیپ گاڑیوں کے ساتھ ساتھ تین لیڈیز اسکوٹرس اور دو بائک سروس کا بھی آج اتوار کو ہری جھنڈی دکھاتےہوئے افتتاح کیا۔
اس موقع پر سبھی سواریوں کا بھٹکل مین روڈ سے فلاور بازار ہوتے ہوئے نیشنل ہائی وے کی طرف گھوم کر شمس الدین سرکل سے شرالی تک چکر لگایا گیا اور سائرن بجاتی ان گاڑیوں کے ذریعے عوام میں بیداری پیدا کرنے کی کوشش کی گئی کہ آئندہ کسی بھی ناگہانی صورت حال میں عوام کو 112 نمبر ڈائل کرنا ہے۔ البتہ اگر کسی کو ایمبولنس سروس یا ہیلتھ سے متعلقہ خدمات کی ضرورت ہو تو اُس کے لئے محکمہ ہیلتھ یا 108 ایمبولنس سروس پر نمبر ڈائل کرنا ضروری ہوگا۔
بھٹکل ڈی وائی ایس پی بیلی ایّپا نے بعد میں اخبارنویسوں کو بتایا کہ جملہ پانچ جیپ گاڑیاں بھٹکل سب دیویژن کے لئے فراہم کی گئی ہیں جس میں ایک گاڑی بھٹکل ٹاون اور بھٹکل مضافاتی پولس تھانہ کے لئے مختص کی گئی ہیں، مرڈیشور اور منکی تھانہ کے لئے ایک، ہوناور تھانہ کے لئے ایک ، کمٹہ کے لئے ایک اور گوکرن کے لئے ایک گاڑی مختص کی گئی ہے۔ اسی طرح پانچ ٹووہیلرس صرف بھٹکل کے لئے مختص کئے گئے ہیں جن میں تین اسکوٹروں کو لیڈیز پولس ہینڈل کریں گی اور خواتین پولس بالخصوص خواتین پر اگر کہیں پر کوئی مسئلہ پیدا ہو، یا کسی نے چھیڑخانی کی ہوتو ایسے موقعوں پر لیڈیز پولس فوری جائے وقوع پر پہنچ جائیں گی۔ اگر کہیں پر کوئی کرائم ہونے کی شکایت ملتی ہے یابچوں پر ظلم کی شکایت موصول ہوتی ہے تو فوری جائے وقوع پر پہنچنے کے لئے دو موٹر بائک مختص کئے گئے ہیں جسے اے ایس آئی کی تحویل میں دیا گیا ہے، یہ سبھی گاڑیاں مختلف جگہوں پر پٹرولنگ کرتی رہیں گی، جیسے ہی کوئی اطلاع موصول ہوگی، سب سے قریب جو گاڑی موجود ہوگی اُس گاڑی کو جائے وقوع پر روانہ کیا جائے گا۔
گاڑیوں کی افتتاحی تقریب کے موقع پر بھٹکل سرکل پولس انسپکٹر دیوراج سمیت دیگر پی ایس آئی و پولس اہلکار موجود تھے۔