بنگلورو میں ہائی ٹینشن وائر کی وجہ سے حادثے، بی بی ایم پی اور بیسکام مشترکہ سروے کریں گے: میئر گنگامبیکے ملیکارجن
بنگلورو،30/مئی(ایس او نیوز)شہر کے مختلف علاقوں سے گزرنے والی 65 کلومیٹر کی ہائی ٹینشن وائر کی وجہ سے بارہا مختلف مقامات پر ہونے والے حادثوں کو ٹالنے کے لئے آج بی بی ایم پی اور بیسکام نے مشترکہ سروے شروع کرنے کا فیصلہ لیا۔ شہر کی میئر گنگامبیکے ملیکارجن کی صدارت میں منعقدہ میٹنگ کے دوران یہ فیصلہ لیاگیا۔ میئر نے آج اپنے دفتر میں بی بی ایم پی میں حکمران پارٹی کے لیڈر عبدالواجد، اپوزیشن لیڈر پدمانابھا ریڈی، جے ڈی ایس کی گروپ لیڈر نیتراوتی نارائن، بیسکام اور بی بی ایم پی افسروں کے ہمراہ میٹنگ کی، میٹنگ میں ان شکایتوں پر غور وخوض کیا گیا کہ حالیہ طوفانی ہواؤں اور بارش کی وجہ سے شہر میں جابجا ہائی ٹینشن وائر ٹوٹ کر گرنے کی وجہ سے حادثے پیش آئے ہیں، آنے والے دنوں میں اس طرح کے حادثے رونما نہ ہوں اس کے لئے احتیاط برتنے اور جن علاقوں میں ہائی ٹینشن وائر گزرتی ہے اس کے آس پاس موجودمکانوں کامکمل سروے کرکے اس کی تفصیل بی بی ایم پی کے پاس رکھنے کا فیصلہ کیا گیا۔ شہر سے 65 کلومیٹر پر مشتمل ہائی ٹینشن وائر گزرتی ہے اس کے ذریعے نہ صرف شہر میں ریاست کے مختلف اضلاع اور پڑوسی ریاستوں کو بجلی کی ترسیل ہوتی ہے، بیسکام، کے پی ٹی سی ایل اور نیشنل پاور گریڈ کے اشتراک سے ان ہائی ٹینشن وائروں کی نگرانی کی جاتی ہے۔ اس موقع پر موجود بی بی ایم پی کمشنر منجوناتھ پرساد نے کے پی ٹی سی ایل، بیسکام اور بی بی ایم پی افسروں کو ہدایت دی کہ مشترکہ طور پر ایسا منصوبہ تیار کیا جائے کہ ہائی ٹینشن وائر کے ٹوٹنے کی وجہ سے آس پاس کے ساکنوں کو کسی طرح کی پریشانی کا سامنا نہ کرنا پڑے۔ شہرمیں دو روز قبل ہوئی بارش اور طوفانی ہواوؤں کی وجہ سے ہائی ٹینشن وائر ٹوٹ کر ایک مکان پر گر گئی جس کے نتیجے میں دو لوگوں کی موت ہوگئی، اس واقعے کے بعد فوراًکارروائی کرتے ہوئے میئر گنگامبیکے نے یہ میٹنگ طلب کی۔