سرسی : ہیسکام میں خالی پڑی ہوئی اسامیوں کی وجہ سے حل نہیں ہوپاتے دیہاتوں میں بجلی کے مسائل
سرسی 31/اکتوبر (ایس او نیوز) امسال پیش آنے والے قدرتی مصائب کی وجہ سے ضلع شمالی کینرا کے مضافات اور شہری علاقوں میں بجلی سے متعلقہ مسائل کا سامنا کرنا پڑ رہا ہے۔لیکن ہیسکام میں خالی پڑی آسامیوں اور اہلکاروں کی کمی وجہ سے عوام کو راحت نہیں مل رہی ہے۔
ضلع شمالی کینرا کے ۱۱ تعلقہ جات کو بجلی فراہمی کے لئے سرسی، کاروار، ہوناور اور ڈانڈیلی پر مشتمل چار زون میں تقسیم کیا گیا ہے۔ ضلع کے لئے جملہ 1865اسامیوں کو منظوری دی گئی ہے۔ مگر اس تاحال صرف1039عہدوں پر تعیناتی عمل میں آئی ہے۔ جس کا مطلب یہ ہے کہ 826اسامیاں خالی پڑی ہوئی ہیں۔موصولہ تفصیلات کے مطابق 22اسسٹنٹ انجینئرز، 56جونیئر اسسٹنٹ انجینئرز، 6اسسٹنٹ ایکزیکٹیو انجینئرز، 5جونیئر انجینئرز،24 آپریٹرز، 33جونیئر میٹر ریڈرزکی جگہ پر تعیناتی ہونا باقی ہے۔اس کے علاوہ 126چیف لائن مین کی جگہ بھرتی ہونا باقی ہے، جس کی وجہ سے دیہاتوں میں بجلی کے مسائل حل کرنے میں محکمہ کو دشواریاں پیش آرہی ہیں۔
یہ پتہ چلا ہے کہ انتظامی شعبے میں 58، سپلائی سیکشن میں 498، ٹرانسفر اینڈ میٹر ٹیسٹنگ یونٹ میں 25، اسٹور ڈپارٹمنٹ میں 8،اور14ڈرائیور کے عہدے بھی خالی ہیں۔بڑا مسئلہ یہ ہے کہ جن عہدوں پر ابھی اسامیوں کی بھرتی نہیں ہوئی ہے، اس سے متعلقہ مسائل کو موجودہ اسٹاف کے ذریعے حل کرنا پڑ رہا ہے۔مضافاتی علاقے کے ایک گاہک کا کہنا ہے کہ بہت ہی اندرونی مضافات میں جو دیہات ہیں وہاں پر ایک بار بجلی لائن میں خرابی پیدا ہوتی ہے تو دو تین دنوں تک وہاں مرمت کے لئے لائن پہنچ پاتے، کیونکہ ایک ایک لائن مین کو دو تین دیہاتوں کی ذمہ داری سنبھالنا پڑ رہا ہے۔
ہیسکام سرسی زون کے ایکزیکٹیو انجینئر دیپک کامت کا کہنا ہے کہ اس مہینے میں پوری ریاست میں بجلی سربراہی کے ضروری خالی اسامیوں کی بھرتی مکمل ہورہی ہے۔امید ہے کہ ضلع شمالی کینرا کی ضرورتوں کے پیش نظر اس بھرتی میں زیادہ حصہ ملے گا اور یہاں پر موجود اسٹاف کی کمی کا مسئلہ بڑی حد تک حل ہوجائے گا۔