بھٹکل میں ٹریلرٹرک الیکٹرک وائرسے ٹکراگیا؛ پاور سپلائی بند ہونے سے ٹل گیا بڑا حادثہ
بھٹکل 24/جولائی (ایس او نیوز) بھٹکل شمس الدین سرکل نیشنل ہائی وے پر مشینوں کے پرزوں والا ایک اونچا اورچوڑا ٹریلر ٹرک الیکٹرک کیبل سے ٹکرا گیا جس کے نتیجے میں کیبل نیچے گر پڑا، اس موقع پر ہائی وے پر کافی سواریاں گذر رہی تھی، مگر یہ اچھا ہوا کہ متعلقہ کیبل سے الیکٹری سٹی نہیں گذر رہی تھی ورنہ بہت بڑا حادثہ رونما ہوسکتا تھا۔
بتایا گیا ہے کہ سرکل کے قریب بندر روڈ پر واقع ایک الیکٹرک کھمبے کو رات کے کسی پہر میں کسی سواری نے ٹکر دی تھی جس کی وجہ سے کھمبے کے نچلے حصے کو شدید نقصان پہنچا تھا اور وہ تیڑھا ہوگیا تھا اس کھمبے سے ساگر روڈ کی طرف واقع ایک کھمبے تک الیکٹرک تار گذررہی تھی۔ غالباً کھمبا تیڑھا ہونے کی وجہ سے بجلی کے کیبل زیادہ اونچائی سے نہیں گذررہے تھے ، دوپہر قریب تین بجے ہبلی سے مینگلور جانے والا ایک ٹریلر جیسے ہی شمس الدین سرکل کو کراس کرتا ہوا آگے بڑھا، نیشنل ہائی وے کے اوپر سے گذرنے والے الیکٹرک کیبل سمیت دوسرے کیبلس سے ٹریلر ٹکرا گیا اور کیبلس ٹریلر میں ہی پھنس گئے۔ اس دوران مخالف سمت جانے والی سڑک پر بھی کیبلس کافی نیچے آگئے، چونکہ بدھ ہونے کی وجہ سے ہمیشہ کی طرح آج پاور سپلائی بند تھا، کیبلس گرنے سے کچھ نقصان نہیں ہوا۔ کیبلس نیچے آتے ہی مقامی لوگوں نے ہیسکام دفتر کو فون کرکے واقعے کی جانکاری دی۔ اس موقع پر نیشنل ہائی وے کچھ دیر کے لئے بند ہوگیا اور سواریوں کی لمبی لائن سڑک کے دونوں طرف لگ گئی۔
اطلاع ملتے ہی ہیسکام اہلکار کچھ منٹوں میں ہی جائے وقوع پر پہنچ گئے اور کیبلس کو کاٹ کر الگ کرتے ہوئے ہائی وے کو سواریوں کے لئے کھول دیا۔ بندر روڈ پر واقع سواری کی ٹکر سے نقصان شدہ الیکٹرک کھمبے کو بھی نکال کر وہاں نیا کھمبا لگادیا گیا ہے۔ موقع پر موجود ہیسکام آفسر نے بتایا کہ بندر روڈ پر واقع الیکٹرک کھمبے کو غالباً منگل کی رات کو کسی سواری نے ٹکر دی ہوگی جس کی وجہ سے کیبلس کافی نیچے سے گذررہے تھے، انہوں نے بتایا کہ سی سی ٹی وی فوٹیج کی مدد سے اُس سواری کا پتہ لگالیا جائے گا اور متعلقہ سواری کے خلاف قانونی کاروائی کی جائے گی۔ انہوں نے عوام الناس سے بھی درخواست کی کہ اگر کہیں پر بھی کیبلس اپنے مقام سے نیچے نظرآئیں یا کوئی بجلی کا کھمبا حادثہ ہونے کی وجہ سے تیڑھا نظر آئے تو ہیسکام دفتر کو خبر کریں۔
مقامی عوام نے اس بات پر اللہ کا لاکھ لاکھ شکر ادا کیا کہ آج صبح سے ہی بجلی بند تھی اور اللہ تعالیٰ نے بہت بڑا حادثہ ہونے سے بچالیا، البتہ مقامی لوگوں نے ہیسکام آفسران پر زور دیا کہ وہ بالخصوص راستوں کے بیچ سے گذرنے والے بجلی کے تاروں کا جائزہ لیتے رہیں۔