بھٹکل نور مسجد کے الیکٹرک سوئچ بورڈ پر اچانک لگ گئی آگ؛ نماز جمعہ کے فوری بعد پیش آیا واقعہ
بھٹکل 3/مئی (ایس او نیوز) یہاں نور جمعہ مسجد میں نماز جمعہ کے فوری بعد الیکٹرک سوئچ بورڈ میں آگ لگ جانے سے کچھ دیر کے لئے افراتفری کا ماحول پیدا ہوگیا، مگر مسجد کےذمہ داران نے فوری طور پر آگ پر قابو پالیا ۔ یہ تو اچھا ہوا کہ آگ کے شعلے اُس وقت بلند ہوئے جب جمعہ نماز کا سلام پھیرا جاچکا تھا اور مسجد میں دُعا چل رہی تھی۔
جمعہ نماز ہونے کی بنا پر پوری مسجد نمازیوں سے بھری ہوئی تھی ،مسجد کے ایک ذمہ دارنے بتایا کہ نماز مکمل ہوتے ہی کافی لوگ باہر چلے گئے تھے جبکہ باقی لوگ دعُا کے لئے بیٹھے تھے کہ اچانک مسجد کے اندر واقع الیکٹرک سوئچ بورڈ کے کمرے کے اندر لوگوں نے دیکھا کہ کسی بورڈ میں آگ کے شعلے اُٹھ رہے ہیں، موقع پر موجود نوجوانوں نے فوری طور پر باہر موجود مین سوئچ کو بند کردیا، مگر مسجد کے اندرمخصوص کمرے میں ایک سوئچ بورڈسے آگ پھیلتے پھیلتے دوسرے سوئچ بورڈوں کو بھی اپنی لپیٹ میں لینا شروع کردیا۔ اس سے پہلے کہ آگ مسجد کے مصلوں اور کارپیٹ کو چھوتی، فوری طور پر اُسے لپیٹ لیا گیا اور ضروری حفاظتی اقدامات کئے جانے لگے۔
بتایا گیا ہے کہ سوئچ بورڈ کے مخصوص کمرے میں آگ لگ جانے سے اس کمرہ سے متصل خواتین کے لئے مخصوص نماز کے کمرے میں کثیر مقدار میں دھواں جمع ہوگیا، یہ تو اچھا ہوا کہ جمعہ کی نماز ہونے کی بنا پر متعلقہ کمرے میں کوئی خاتون موجود نہیں تھی۔
خبر ملتے ہی فائر بریگیڈ بھی موقع پر پہنچ گئی، مگر اُس وقت تک نوجوانوں نے آگ پر مکمل طور پر قابو پالیا تھا۔
آگ لگنے سے کمرے میں موجود الیکٹرک کے تمام سوئچ بورڈ سمیت وائرس مکمل طور پر جل کر خاکستر ہوگئے ہیں، ساتھ ساتھ بورڈ والا پورا کمرہ بھی آگ کے شعلوں سے کالا پڑ گیا ہے۔
سمجھا جارہا ہے کہ بجلی کے کھمبے پر کچھ مسئلہ ہونے سے نیوٹرل کیبل پر فیس کی بجلی دوڑرہی تھی، جس کے نتیجے میں سوئچ بورڈ میں آگ لگنے کا خدشہ ظاہر کیا گیا ہے۔ شام سات بجے تک بجلی کو درست کرنے کا کام جاری تھا۔