ریاست کرناٹک میں جلد ہی الیکٹرک بس سرویس کا آغاز: لکشمن ساودی
داونگرے،20؍جنوری (ایس او نیوز) ریاستی نائب وزیراعلیٰ وزیر ٹرانسپورٹ لکشمن ساودی نے بتایا کہ ریاست میں جلد ہی300 الیکٹرک بسوں کو دوڑایا جائے گا۔
داونگرے میں ہائی ٹیک بس اسٹانڈ کی تعمیر کے لئے سنگ بنیاد رکھتے ہوئے لکشمن ساودی نے یہ جانکاری دی اور کہا کہ اس سلسلہ میں اسی ماہ کابینہ اجلاس میں فیصلہ کیا جائے گا۔
انہوں نے بتایا کہ زیادہ آلودگی سے متاثرہ شہروں میں دو کروڑ روپئے قیمتی الیکٹرک بسیں خریدنے مرکزی حکومت 55لاکھ روپئے کی امداد کررہی ہے اور نجی کمپنیاں اس اسکیم کے تحت بس خرید کرکے ایس آر ٹی سی کو فراہم کریں گی۔
انہوں نے بتایا کہ کے ایس آر ٹی سی اپنے ڈرائیوروں اور کنڈکٹروں کا استعمال کرکے ان بسوں کی سرویس شروع کرے گا اور کلومیٹر کے حساب سے نجی کمپنیوں کے ساتھ معاہدہ کیا جائے گا۔
انہوں نے بتایا کہ کے ایس آر ٹی سی کو کورونا لاک ڈاؤن و دیگر وجوہات کی بنا پر کل 4ہزار کروڑ کا نقصان ہوا ہے لیکن اس کے باوجود کارپوریشن کو کسی بھی حالت میں بند نہیں کیا جائے گا اور عملہ کو تحفظ فراہم کیا جائے گا۔
