نئی دہلی 24/مئی (ایس او نیوز/ ایجنسیز)قومی اورمختلف ملک کے رہنماؤں نے لوک سبھا انتخابات 2019کے نتائج کے اعلان پر بھارتیہ جنتاپارٹی (بی جے پی)کی بہترین کارکردگی پر وزیراعظم نریندرمودی کو مبارک باد دی ہے۔اسرائیل کے وزیراعظم بنیامن نیتن یاہو نے انتہائی انوکھے انداز میں ہندی میں ٹوئیٹ کرکے مودی کو مبارک باد دی۔
اسرائیلی وزیراعظمنے کہا”میرے دوست نریندرمودی آپ کی مؤثر انتخابی جیت پر دل کی گہرائیوں سے مبارک باد۔یہ انتخابی نتیجے ایک بار پھر دنیا کی سب سے بڑی جمہوریت میں آپ کی قیادت کو ثابت کرتے ہیں۔ہم ساتھ مل کر ہندوستان اور اسرائیل کے مابین گہری دوستی کو مضبوطی فراہم کرنا جاری رکھیں گے۔بہت خوب،میرے دوست“۔
سری لنکا کے صدر میتری پال سری سینا نے بھی مودی کو مبارک باد دی ہے۔انھوں نے ٹوئیٹ کیا،”آپ کی جیت اور آپ کی قیادت میں لوگوں کے دوبارہ اعتماد ظاہر کرنے پر مبارک باد۔سری لنکا مستقبل میں ہندوستان کے ساتھ قریبی اور مثبت رشتے جاری رکھنے کے تئیں پرامیدہے“۔
کمیونسٹ پارٹی آف انڈیا کے قومی سکریٹری اتل کمار انجان نے لوک سبھا الیکشن کے نتائج پر اپنا ردعمل ظاہر کرتے ہوئے کہا کہ وزیر اعظم نریندر مودی نے یہ الیکشن تمام طرح کی تنگ نظری بالخصوص نسلی اور مذہبی تنگ نظری کی بنیاد پر لڑا اور اپنا ایجنڈا سیٹ کیا۔ انجان نے کہا کہ اس الیکشن میں اپوزیشن کی شکست کی اہم وجہ یہ ہے کہ اس کے اتحاد کو کانگریس پارٹی نے منہدم کیا۔ کانگریس صدر راہل گاندھی کی پالیسیوں نے اپوزیشن اتحاد کو کمزور کر تے ہوئے مودی کی جیت کا راستہ ہموار کیا
نیشنل کانفرنس کے نائب صدر اور سابق وزیر اعلیٰ عمر عبداللہ نے بی جے پی کو مبارکباد پیش کرتے ہوئے کہا کہ بی جے پی اور این ڈی اے کی جیت کا کریڈٹ وزیر اعظم نریندر مودی اور بی جے پی صدر امیت شاہ کو جاتا ہے۔انہوں نے کہا کہ وزیر اعظم مودی اور امیت شاہ نے ایک بہت ہی پیشہ ورانہ مہم چلائی جس کے نتیجے میں پارٹی کو مزید پانچ سال تک حکومت کرنے کا موقع نصیب ہوا۔عمر عبداللہ نے اپنے ایک ٹویٹ میں کہا”ایگزٹ پول سرویز درست ثابت ہوئے۔ اب صرف بی جے پی اور این ڈی اے کو مبارکباد پیش کرنا باقی رہ گیا ہے“۔
کانگریس نے ووٹوں کی گنتی کے رجحانات کو الیکٹرانک ووٹنگ مشینوں کے بھارتیہ جنتا پارٹی کے لئے 'الیکٹرانک وکٹری مشین' بننے کا نتیجہ بتایا اور کہا کہ یہ بی جے پی کی نہیں بلکہ وزیر اعظم نریندر مودی کی جیت ہے۔کانگریس کے ترجمان ابھیشیک منو سنگھوی نے کہا ہے کہ جو سبقت حکمراں پارٹی کو ملی ہے وہ بی جے پی نہیں بلکہ براہ راست مودی کی جیت ہے اور اس جیت کا کریڈٹ صرف مودی کو جاتا ہے۔
وزیر خارجہ اور بی جے پی کی رہنما سشما سوراج نے وزیر اعظم نریندر مودی کو 17 ویں لوک سبھا انتخابات میں پارٹی کی فتح حاصل کرنے کے لئے مبارکباد دی۔ محترمہ سوراج نے ایک ٹویٹ میں کہا ”وزیر اعظم، آپ کو بہت بہت مبارک ہو کہ بھارتیہ جنتا پارٹی کو اتنی بڑی فتح حاصل ہوئی۔ میں ملک کے عوام کے تئیں دل سے تعریف کرتی ہوں“۔محترمہ سوراج نے صحت وجوہات کی وجہ سے انتخاب نہ لڑنے کا فیصلہ کیا تھا۔
افغانستان کے صدر اشرف غنی نے بھی زبردست اکثریت ملنے پر ہندوستانی وزیراعظم کو مبارک باد دی ہے۔ انہوں نے ٹوئیٹ کیا،”جنوبی ایشیا میں علاقائی تعاون،امن وخوشحالی کے لئے دونوں ملکوں کے مابین قریبی تعاون کے مستحکم ہونے کی امیدہے“۔
نیپال کے وزیراعظم کے پی شرما اولی نے مودی کو مبارک باد دی اور کہا،”میں لوک سبھا انتخابات 2019میں زبردست جیت کے لیے وزیراعظم نریندرمودی کو دل کی گہرائیوں سے مبارک باد دیتاہوں۔