بھٹکل 4/اپریل (ایس او نیوز) کرناٹک کے وزیراعلیٰ کماراسوامی کی کار کو بھٹکل میں انتخابی آفسران نے چیکنگ کے لئے روک دیا اور کار کی ڈکی کھول کر  سامانوں کی تلاشی لی گئی۔ یہ واردات  بدھ کی شب اُڈپی۔اُترکنڑا سرحد  پر واقع بھٹکل تعلقہ کے  گورٹے کراس چیک پوسٹ پر پیش آئی۔

لوک سبھا انتخابات کے پیش نظر ریاست کے مختلف چیک پوسٹوں پر سواریوں کی تلاشی کا کام جاری ہے، جیسے ہی کنداپور میں ماہی گیروں کے ایک  پروگرام میں شرکت کے بعد وزیراعلیٰ ایچ ڈی کماراسوامی کاروار جانے کے لئے بھٹکل سرحد پر پہنچے،  چیک پوسٹ پر سواریوں کی تلاشی کا کام جاری تھا، ایسے میں وزیراعلیٰ کماراسوامی کی کار کو بھی روک دیا گیا اور اُن کی بھی سواری کی تلاشی لی گئی۔

شمس الدین سرکل پر والہانہ استقبال:  کنداپور سے کاروار روانگی کے موقع پر جیسے ہی کماراسوامی کی سواریوں کا قافلہ بھٹکل شمس الدین سرکل پہنچا، جے ڈی ایس کارکنوں نے ان کا والہانہ استقبال کرتے ہوئے انہیں پھولوں کی مالائیں پیش کیں۔ بھٹکل جے ڈی ایس صدر عنایت اللہ شاہ بندری کی قیادت میں سرکل پر جے ڈی ایس کارکنوں نے  کمار انّا کی جے کے نعرے لگائے، اس موقع پر کافی بڑا ہجوم سرکل پر پہلے سے ہی جمع تھا۔ کماراسوامی نے اپنی سواری سے باہر نکلتے ہوئے عوام الناس سے ہاتھ ملایا، پھولوں کی مالائیں وصول کیں، بعد میں اپنی کار پر ہی کھڑے ہوکر ہاتھ ہلاتے ہوئے اُن کا شکریہ ادا کیا، بعد میں  اُن کا قافلہ کاروار کے لئے آگے بڑھ گیا۔

آنند اسنوٹیکر آج داخل کریں گے پرچہ نامزدگی:   کانگریس۔جے ڈی ایس   متحدہ اُمیدوار  آنند اسنوٹیکر آج  کاروار میں اپنا پرچہ نامزدگی داخل کریں گے، جس کے لئے خصوصی طور پر کماراسوامی  کاروار پہنچ گئے ہیں، ایسے میں خبر ملی ہے کہ ضلع اُتر کنڑا کے  انچارج وزیر آر وی دیش پانڈے  پرچہ نامزدگی داخل کرنے کے موقع پر موجود نہیں رہیں گے۔اسی طرح وزیراعلیٰ کماراسوامی کے پروگراموں میں بھی دیش پانڈے شریک نہیں ہوں گے۔ بتایا گیا ہے کہ   دیش پانڈے   کسی پروگرام میں شریک ہونے دھارواڑ گئے ہیں۔

یاد رہے کہ اُتر کنڑا میں لوک سبھا انتخابات  کے لئے 23اپریل کو انتخابات ہوں گے، جس کے لئے پرچہ نامزدگی داخل کرنے کا آج آخری دن ہے۔ کل بدھ تک جملہ 10 اُمیدواروں کی طرف سے 18  پرچہ نامزدگیاں داخل کی گئیں تھیں۔