نئی دہلی ، 20 اپریل(ایس او نیوز؍آئی این ایس انڈیا) وزیر اعظم نریندر مودی کے ساتھ منسلک ایک ویب سیریز کو الیکشن کمیشن کی جانب سے جھٹکا لگا ہے۔دراصل الیکشن کمیشن نے اس ویب سیریز کو ریلیز کر رہے پلیٹ فارمس ارس ناؤ کو نوٹس جاری کر اسے فوری اثر سے ہٹانے کا حکم دیا ہے۔الیکشن کمیشن نے اپنے ایک حکم میں کہاکہ ہمارے علم میں آیا ہے کہ’ مودی جرنی آف کامن مین‘کے پانچ اقساط آپ کی ویب سائٹ پر دستیاب ہیں۔اگلے حکم تک اسے آن لائن ریلیز کو روکنے اور اس سے متعلق تمام مواد کو ہٹانے کی ہدایات دی جاتی ہیں۔ آپ کوبتا دیں کہ اس سے پہلے پی ایم مودی پر مبنی بائیوپک’پی ایم نریندر مودی‘ کی ریلیز پر انتخابات تک روک لگا دی گئی۔کمیشن نے کہا کہ ایسی فلم جو کسی سیاسی پارٹی یا شخص کے لئے مددگار ثابت ہو، اسے الیکٹرانک میڈیا میں نشر نہیں کیا جا سکتا،یہ فلم پہلے مرحلے کی پولنگ کے دن 11 اپریل کو ریلیز ہونے والی تھی۔اتنا ہی نہیں کمیشن نے بی جے پی کے نمو ٹی وی کو لے کر بھی کارروائی کی ہے۔کمیشن نے واضح کیا ہے کہ پولنگ سے 48 گھنٹے پہلے انتخابی مہم تھمنے کے دوران نمو ٹی وی پر الیکشن سے متعلق پروگرام نشر نہیں کئے جا سکیں گے۔