بھٹکل میں عیدالفطر کی نماز اس بار عیدگاہ میں ہونے کی توقع؛ چار سال کے وقفہ کے بعد عیدگاہ میں ہوگی نماز
بھٹکل 2/جون (ایس او نیوز) اس بار عید کے موقع پر چونکہ بارش کے آثار نظر نہیں آرہے ہیں، اس لئے عیدالفطر کی نماز عیدگاہ میں پڑھنے کا فیصلہ کیا گیا ہے، اس بات کی اطلاع عیدگاہ انتظام کمیٹی کے سکریٹری جناب محمد صادق اسرمتا نے دی۔انہوں نے بتایا کہ قریب چار سال کے وقفے کے بعد عیدگاہ میں عید کی دوگانہ ادا کی جائے گی۔
واضح رہے کہ اس سے قبل 24 ستمبر 2015 کو مولانا ارشاد نائطے ندوی نے عید الاضحیٰ کی نماز عیدگاہ میں پڑھائی تھی ۔
حال ہی میں کی گئی عیدگاہ کی تزئین و تجدید کے بعد یہ پہلا موقع ہے کہ عیدگاہ میں نماز ادا کی جارہی ہے۔ یاد رہے کہ عیدگاہ کے فرش پر اب ماربل بچھایا گیا ہے اور پینٹنگ و دیگر تزئین کاری کے ساتھ عیدگاہ کو نہایت خوبصورت بنایا گیا ہے، عیدگاہ کی تزئین و تجدید کے بعد قریب تین سال قبل رسمی طور پر افتتاح عمل میں آیا تھا، مگر بارش اور موسمی تبدیلیوں کی وجہ سے نماز ادا کرنے کا موقع نہیں ملا تھا۔ اب تزئیین و مرمت کے بعد پہلی بار عیدکی نماز ادا کی جائے گی۔
جناب محمد صادق نے بتایا کہ اس بار جامع مسجد کے خطیب مولانا عبدالعلیم خطیب ندوی عیدالفطر کی نماز دوگانہ پڑھائیں گے، عیدگاہ میں صبح ٹھیک آٹھ بجے نماز کھڑی ہوگی، جس کے لئے صبح ساڑھے سات بجے جامع مسجد سے جلوس نکلے گا۔ انہوں نے یہ بھی بتایا کہ اگر عین عید کے دن بارش ہوتی ہے تو پھر جامع مسجدوں میں صبح ٹھیک 8 بجے اوربعض مساجد میں 8:15 بجے نماز ادا کی جائے گی۔
جامعہ عیدگاہ میں صبح آٹھ بجے نماز: اُدھر تینگن گنڈی میں مرکزی جماعت المسلمین تینگن گنڈی نے اطلاع دی ہے کہ جامعہ آباد عیدگاہ میں عیدالفطر کی نماز دوگانہ صبح ٹھیک آٹھ بجے شروع ہوگی۔پریس ریلیز میں بتایا گیا ہے کہ اگر عید کے دن بارش ہوتی ہے تو پھر جامع مسجد سیدنا ابراہیم جامعہ آباد میں صبح ٹھیک آٹھ بجے اور جامع مسجد تیگن گنڈی میں 8:15 بجے نماز ادا کی جائے گی۔