مرڈیشور 26جنوری(ایس او نیوز) الاحسان ویلفیئر ٹرسٹ (رجسٹرڈ) کا سالانہ اجلاس مرڈیشور مرکزی جماعت المسلمین کے دفتر میں منعقد ہوا، جس میں نئی سہ سالہ میقات کے لئے عہدیداران کا انتخاب بھی عمل میں آیا۔

 الاحسان ویلفیئر ٹرسٹ کمٹہ گزشتہ چھ سال قبل قائم ہواتھا جوکمٹہ اور اس کے اطراف کے لوگوں کے لئے غیر سودی قرضہ جات کی فراہمی اورسماجی فلاح وبہبود کی خدمات انجام دے رہا ہے۔ سالانہ اجلاس کی صدارت ٹرسٹ کے صدر جناب مولانامحمد حسین گیما نے کی۔ انہی کی تلاوت سے جلسے کا آغاز ہوا۔  

  ایجنڈے کے مطابق جنرل سیکریٹری مظفر شیخ کی طرف سے تیارکردہ سابقہ اجلاس کی روئیداد ٹرسٹ کے خازن جناب ڈاکٹر محمد حنیف شبابؔ نے پڑھ کر سنائی، جسے حاضرین نے منظوری دی۔ اس کے بعد سالانہ حساب و کتاب کی آڈٹ شدہ رپورٹ بھی پیش ہوئی جس کی توثیق کی گئی۔ ٹرسٹ کو مزید فعال اور مستحکم بنانے کے لئے جنرل سیکریٹری مظفر شیخ نے دو اراکین کو ٹرسٹ میں شامل کرنے کی تجویز رکھی اور مرڈیشور جماعت کے صدر جناب سیف اللہ محمد امین اور منکی کی معروف شخصیت جناب ابومحمد مختصر کے نام پیش کیے۔ حاضرین نے اسے منظوری دی۔

 اس کے بعد نئی میقات کے لئے عہدیداران کا انتخاب عمل میں آیا۔ سابقہ میقات کے صدر جناب مولانا محمد حسین گیما اور جنرل سیکریٹری مظفر شیخ کو بالترتیب ان کے عہدوں پر برقرار رکھا گیا۔ اس کے علاوہ جناب قادر میراں پٹیل بھٹکل نائب صدر،جناب سرفرازعمر شیخ محاسب اور جناب طہٰ بدرالحسن معلم خازن منتخب ہوئے۔ ٹرسٹیان میں جناب ڈاکٹر محمد حنیف شبابؔ، جناب بستی عبدالملک اور جناب ایس ایم سید رئیس شامل ہیں۔

 ٹرسٹ کو مالی طور پر زیادہ مستحکم کرنے اور اس کی سرگرمیوں کا دائرہ بڑھانے کے سلسلے میں مختلف تجاویز زیرغور آئیں اور اس ضمن میں کچھ اہم اقدامات کرنے کا فیصلہ کیا گیا۔اجلاس میں خصوصی مدعوئین کے طور پرجناب سیف اللہ محمد امین کے علاوہ مرڈیشور کے چند معززین موجود تھے۔