بیدر،29؍مئی(ایس او نیوز؍محمدامین نواز) ایس ایس ایل سی (جماعت دہم)امتحان کے متعلق ریاستی ہائی کورٹ میں داخل کی گئی درخواست کو نپٹادئیے جانے کے بعد اب ایس ایس ایل سی (جماعت دہم) امتحان کے اہتمام میں کسی طرح کی رکاؤٹ نہیں  ہے۔حکومت نے اس امتحان کے انعقاد کرنے کیلئے جن تاریخوں کااعلان کیا ہے ان کے مطابق ہی امتحان لیا جائے گا۔یہ بات ریاستی وزیر برائے بنیادی و ثانوی تعلیم مسٹر سریش کمار نے کہی۔

انھوں نے کہا کہ کورونا وائرس سے بچنے کیلئے سخت احتیاطی تجاویز کے ساتھ ایس ایس ایل سی (جماعت دہم) امتحان کروایا جارہا ہے۔ یہ کوشش کی جارہی ہے کہ بچوں پر امتحان کا دباؤ کم سے کم ہو‘کرناٹک سکینڈری ایجوکیشن ایگزامنیشن بورڈ کی جانب سے ریاست میں امتحان کی تیاری تیزی سے جاری ہے۔ بھارت اسکاؤٹس اینڈ گائیڈس اور دیگر رضاکاروں کی جانب سے امتحان میں حصہ لینے والے طلباء کی رضاکارانہ مدد کیلئے پہل کی گئی ہے۔ بعض نجی کمپنیوں اور اداروں کی جانب سے امتحانی مراکز میں سینیٹائزر مہیا کرانے کی پیشکش کی گئی ہے۔

محکمہ تعلیماتِ عامہ کی ہدایت کے مطابق ہر طالبِ علم کو امتحان میں حصہ لینے کیلئے ماسک پہن کر آنا لازمی ہے۔ محکمہ کی جانب سے ہر طالبِ علم کو دو ماسک مہیا کرائے جائیں گے۔ایگزامنیشن بورڈ کی جانب سے ہر امتحانی مرکز میں امتحان شروع ہونے سے ایک گھنٹہ پہلے تمام طلبا کی طبی جانچ کا نظم کیا گیا ہے۔ہر امتحانی مرکز کو دو تھرمل اسکینر مہیا کرائے گئے ہیں۔ طبی جانچ کے دوران اگر طلباء کو بخار میں مبتلا پایا گیا تو ان کو امتحان لکھنے کیلئے الگ کمرے میں بٹھایا جائے گا۔جن طلباء  میں کورونا کی علامتیں انھیں ایک کمرے میں اکیلے بٹھاکر امتحان لکھویا جائے گا۔اس کیلئے ہر امتحانی مرکز میں افزود کمرے پہلے ہی مقرر کئے گئے ہیں۔ امتحانی مرکز میں سماجی فاصلے کی پابندی رکھنے کیلئے ابھی سے انتظامات شروع کئے جاچکے ہیں۔ہر طالبِ علم کو ایک دوسرے سے کم از کم ایک میٹر دور رکھنے کیلئے ہدایت دی جاچکی ہے۔بیٹھنے کے انتظامات بھی اسی بنیاد پر کروائے جارہے ہیں۔

انھوں نے کہا کہ طلباء کی طبی جانچ کے دوران محکمہ صحت کا عملہ بھی ہرامتحانی مرکز میں موجود رہے گا۔ امتحانی مرکز میں کئے گئے انتظامات کے متعلق طلباء اور والدین کو اطمینان ہوجائے۔ اس کیلئے امتحان سے ایک دن پہلے ہی طلباء اور ان کے والدین کو امتحان کے مرکز کا معائنہ کرنے کی اجازت بھی دی گئی ہے‘ تاکہ وہ بے خوف ہوکر بچوں کو امتحان میں شرکت کرواسکیں۔