بنگلورو، 20؍دسمبر (ایس او نیوز) ریاستی وزیر برائے پرائمری وسکنڈری تعلیم بی، سی، ناگیش نے کہا کہ مطالعہ کا شوق رکھنے والوں کی سہولت کی خاطر بنگلورو میں ”پستکا سودھا“ تعمیر کرنے کے سلسلہ میں وزیر اعلیٰ کے ساتھ تبادلہئ خیال کیاجائے گا۔

کرناٹک کنڑا قلمکاروں اور پبلشرز تنظیم کی جانب سے گاندھی بھون میں منعقد پروگرام میں اہل افراد کو مدرنا رتنا سمیت مختلف ایوارڈز پیش کرتے ہوئے ناگیش نے اس خیال کا اظہار کیا۔ انہو ں نے کہا کہ کتب بینوں کی سہولت کی خاطر بنگلور میں پستکا سودھا تعمیر کرنے کے سلسلہ میں انہوں نے وزیر اعلیٰ بسواراج بومئی کے ساتھ بات کی ہے۔

انہو ں نے کہا کہ حکومت کا مقصد ہر گرام پنچایت میں معیاری لائبریری قائم کرنا ہے جس کے پیش نظر گرام پنچایت سطح پر 5900 لائبریریوں کا آغاز کیا گیا ہے۔ انہو ں نے بتایا کہ تنظیم کی جانب سے کتابوں کی خریداری کی رقم میں اضافہ ودیگر مطالبات کو پیش کیا گیا ہے۔ اس سلسلہ میں جلد ہی ایک اجلاس طلب کرکے فیصلہ لیا جائے گا۔

اس موقع پر خطاب کرتے ہوئے کرناٹک بارڈ ایریا ڈیولپمنٹ بورڈ کے صدر ڈاکٹر سی سو شیکھر نے کہا کہ بورڈ اس سے قبل سرحدی علاقوں کے گاؤں میں سڑک، ڈرائینج ودیگر ترقیاتی کاموں کیلئے مالی امداد فراہم کرتا تھا اب آنے والے دنوں میں لائبریریوں کے لئے بھی مال امداد دی جائے گی۔ پروگرام میں قلمکار جوگی کو ساہتیہ رتنا، قلمکار منجولا ہیرے مٹھ کو چگرو، موہن کو پستکارتنا ایوارڈ سے نوازا گیا۔اس موقع پر لائن اشوک کمار ودیگر حاضر رہے۔