بنگلورو، 9؍اکتوبر(ایس او  نیوز)حکومت کرناٹک نے تعلیمی نظام میں بار بار تبدیلی کرنے کی اپنی عادت کو دہراتے ہوئے اب بنیادی تعلیم کے شعبہ میں ایک بڑی تبدیلی لانے کا اعلان کیا ہے۔ یہ کہا جا رہا ہے کہ رواں سال سے پانچویں اور آٹھویں جماعت کے لئے پبلک امتحان کروایا جائے گا۔اس ضمن میں 12اکتوبر کو محکمہ تعلیمات کی طرف سے سرکاری حکم نامہ جاری کیا جا سکتا ہے۔

ریاست کے محکمہ اسکولی تعلیمات کا یہ ماننا ہے کہ پانچو یں اور آٹھویں جماعت میں زیر تعلیم بچوں کی تعلیم کے معیار میں سدھار کے لئے یہ ضروری ہو گیا ہے کہ ان دونوں مرحلوں کے لئے پبلک امتحان کروایا جائے۔محکمہ کے ذرائع نے بتایا کہ اس پبلک امتحان کا اہتمام رواں سال سے ہو گا یا اگلے سال سے اس کے بارے میں صراحت 12اکتوبر کے حکم نامہ میں کی جائے گی۔

بتایا جاتا ہے کہ ریاستی وزیر برائے اسکولی تعلیم بی سی ناگیش کی صدارت میں ہوئی ایک اعلیٰ سطحی میٹنگ میں جو 12اکتوبر کو طلب کی گئی ہے،اس کے بارے میں قطعی فیصلہ لیا جائے گا۔ریاستی حکومت کی اس تجویز پر ملا جلا رد عمل سامنے آیا ہے۔ بعض لوگوں نے جہاں اس فیصلہ کو تعلیمی معیار کو بہتر بنانے میں معاون قرار دیا ہے تو بعض نے اس فیصلہ کے لئے و زیر تعلیم کی نکتہ چینی کی ہے اور کہا ہے کہ ان کی طرف سے محکمہ تعلیم میں جو اندھا قانون چلایا جا رہا ہے، اس سے ہزاروں بچوں کا مستقبل خطرہ میں پڑگیا ہے۔

یا درہے کہ ریاست کی اسی حکومت نے اس سے پہلے آٹھویں جماعت کے لئے طے شدہ پبلک امتحان کو واپس لینے کا فیصلہ لیا تھا، اب اچانک آٹھویں جماعت کے ساتھ پانچویں جماعت کے لئے پبلک امتحان کروانے کی تیاری کی جا رہی ہے۔ کچھ لوگوں کا کہنا ہے کہ حکومت کو اگر آٹھویں اور پانچویں جماعت کے لئے پبلک امتحا ن کروانا ہی ہے تو اس فیصلہ کا نفاذ اسی سال نہیں بلکہ اگلے سال سے کرنا چاہئے، تاکہ والدین اور طلباء کو اس کی تیاری کرنے کا مناسب موقع مل سکے۔

اس سلسلہ میں کانگریس کے ترجمان اور سابق رکن کونسل رمیش بابو نے وزیر اعلیٰ بسواراج بومئی اور محکمہ تعلیمات کے اعلیٰ افسروں کو روانہ کئے گئے ایک مکتوب میں محکمہ تعلیم کی اس تجویز کی سخت مخالفت کی ہے۔ انہوں نے کہا ہے کہ گزشتہ ایک سال سے محکمہ تعلیمات کے متعدد فیصلہ تنازعہ کا سبب رہے ہیں۔ انہوں نے کہا کہ اب پانچویں اور آٹھویں جماعت کے لئے پبلک امتحان کروانے کا تازہ فیصلہ بھی تنازعہ کا سبب بنا ہے۔ انہوں نے کہا کہ کمسن طلباء کے لئے حکومت کا یہ فیصلہ مستقبل کو خطرہ میں ڈالنے کے مترادف ہو گا۔ انہوں نے کہا کہ اس فیصلہ پر حکومت نظرثانی کرے اور کمسن بچوں پر پبلک امتحان کا بوجھ نہ لادے۔