جیٹ ایئر ویز کے بانی نریش گوئل کے دہلی اور ممبئی ٹھکانوں پرای ڈی کا چھاپہ
نئی دہلی،23/اگست (ایس اونیوز/آئی این ایس انڈیا) ای ڈی نے غیر ملکی زر مبادلہ قانون کے مبینہ خلاف ورزی کے حوالے سے جیٹ ایئر ویز کے بانی نریش گوئل کے ٹھکانوں پر جمعہ کو چھاپہ مارا ہے۔حکام نے اس کی اطلاع دی۔انہوں نے کہا کہ دہلی اور ممبئی میں واقع 12 ٹھکانوں پر چھاپہ ماری کی گئی ہے۔انہوں نے کہا کہ یہ تلاشی غیر ملکی زر مبادلہ کے انتظام ایکٹ (فیما) کے تحت کی گئی اور اس کا مقصد اضافی ثبوت مہیا کرنا تھا۔جیٹ ایئر ویز نقدی بحران کے بعد 17 اپریل سے خدمات سے باہر ہے۔ذرائع نے جولائی میں کہا تھا کہ کارپوریٹ امور کی وزارت کی تحقیقات میں کمپنی کے فنڈ کو ادھر ادھر کرنے سمیت وسیع سطح پر بے ضابطگی کا پتہ چلا تھا۔ حال ہی میں نریش گوئل اور ان کی بیوی کو لندن جانے سے روک دیا گیا تھا۔جیٹ ایئر ویز پر بینکوں کا 11 ہزار کروڑ کا قرض ہے۔650 کروڑ کے ٹیکس چوری کو لے کر جانچ چل رہی ہے۔نریش گوئل پر ایف آئی پی بی اور فیما کے قوانین کی خلاف ورزی کرنے کا الزام ہے۔نریش گوئل نے مارچ میں کمپنی کے چیئرمین کا عہدہ چھوڑ دیا تھا۔کمپنی فی الحال دیوالیہ پن کا شکار ہے۔ ایس ایف آئی او نے جمعرات کو بھی جیٹ ایئر ویز کے بانی نریش گوئل سے پوچھ گچھ کی تھی۔سرکاری ذرائع نے بتایا کہ گوئل سے یہ پوچھ گچھ جیٹ ایئر ویز میں مبینہ مالی بدعنوانی کو لے کر کی گئی تھی۔کارپوریٹ امور کی وزارت نے جولائی میں جیٹ ایئر ویز کے معاملے کی ایس ایف آئی یو انکوائری کی ہدایت دی تھی۔بڑے پیمانے پر بے ضابطگیوں اور فنڈ کو ادھر ادھر کرنے کا معاملہ سامنے آنے کے بعد یہ ہدایت دی تھی۔