نئی دہلی، 25 مئی(ایس او نیوز/آئی این ایس انڈیا) منی لانڈرنگ کیس میں کانگریس جنرل سکریٹری پرینکا گاندھی واڈرا کے شوہر رابرٹ واڈرا کی مشکلیں بڑھ سکتی ہیں۔ای ڈی  نے دہلی ہائی کورٹ میں رابرٹ واڈرا کو ملی ضمانت منسوخ کرنے کا مطالبہ کیا ہے۔دہلی ہائی کورٹ میں ای ڈی نے مطالبہ کیا ہے کہ انہیں رابرٹ واڈرا کی حراست دی جائے، تاکہ وہ ان سے پوچھ گچھ کر پائیں۔واڈرا کو نچلی عدالت سے ضمانت مل گئی ہے، لیکن ای ڈی اس فیصلے کے خلاف ہائی کورٹ پہنچ گئی ہے۔گزشتہ دنوں ہی رابرٹ واڈرا نے سی بی آئی کورٹ میں بیرون ملک جانے کی اجازت مانگی تھی۔رابرٹ واڈرا کے وکیل کی جانب سے مطالبہ کیا گیا تھا کہ انہیں بیرون ملک جانے دیا جائے، ساتھ ہی اس حکم کو خفیہ رکھا جائے۔منی لانڈرنگ کیس میں رابرٹ واڈرا کو دہلی کی ایک خصوصی عدالت نے مشروط ضمانت دے رکھی ہے۔انہیں حالات میں انہیں بیرون ملک جانے پر روک بھی شامل ہے۔واڈرا کا پاسپورٹ بھی عدالت کے پاس ہی ہے۔گزشتہ مہینوں میں منی لانڈرنگ کیس میں واڈرا سے ای ڈی کئی بار پوچھ گچھ کر چکا ہے۔آپ کو بتا دیں کہ رابرٹ واڈرا پر برطانیہ میں کئی املاک غلط طریقے سے حاصل کرنے کا الزام ہے۔ای ڈی کی جانب سے الزام لگایا گیا ہے کہ یہ جائیداد انہوں نے منی لانڈرنگ کے ذریعے حاصل کی ہے۔اس معاملے میں رابرٹ واڈرا کے علاوہ مفرور ہتھیار کاروباری سنجے بھنڈاری کا بھی نام شامل ہے۔رابرٹ واڈرا کو جن شرائط کی بنیاد پر ضمانت ملی ہے، اس میں باہر نہ جانا،ثبوتوں سے چھیڑ چھاڑ نہ کرنا، جب بھی ای ڈی بلائے تو تحقیقات میں تعاون کرنے کے لئے ایجنسی کے پاس آنا شامل ہے۔