نئی دہلی ،19؍اپریل (ایس او نیوز؍آئی این ایس انڈیا) لوک سبھا انتخابات کے دوران الیکشن کمیشن مثالی ضابطہ اخلاق کی خلاف ورزی کرنے کے معاملے میں کسی بھی طرح کی کوتاہی نہیں برت رہا ہے۔چھوٹے سے چھوٹے مسئلے پر الیکشن کمیشن سختی سے قدم اٹھا رہا ہے۔ کانگریس صدر راہل گاندھی کے پارلیمانی حلقہ امیٹھی میں ایک ایسا ہی معاملہ سامنے آیا ہے۔امیٹھی واقع ایک علاقے میں کسی گھر کے باہر دیوار پر کانگریس کے ’انصاف یوجنا‘ کا بینر لگادیاگیا جس کے بعد گھر کے مالک نے الیکشن کمیشن سے شکایت کر دی کہ بغیر اجازت کے کانگریس کی طرف سے یہ پوسٹر لگایا گیا ہے۔الیکشن کمیشن نے جمعرات کو کانگریس صدر راہل گاندھی کو مثالی ضابطہ اخلاق کی خلاف ورزی کی صورت میں نوٹس جاری کیا ہے۔کانگریس کے انصاف منصوبہ بندی کا بینر امیٹھی میں ایک گھر کی دیوار پر لگایا گیا تھا، اور اس کے لئے گھر کے مالک سے اجازت نہیں لی گئی تھی۔اس شکایت کے بعد الیکشن کمیشن کی طرف سے راہل گاندھی سے 24 گھنٹے میں جواب دینے کے لئے کہا گیا ہے۔بتا دیں راہل گاندھی لوک سبھا انتخابات میں یوپی کے امیٹھی سیٹ کے علاوہ کیرالہ کے وایناڈ پارلیمانی علاقے سے الیکشن لڑ رہے ہیں۔گزشتہ دنوں اتر پردیش کے بلند شہر کی ایک عدالت میں راہل گاندھی کے خلاف ہتک عزت کی شکایت داخل کی گئی تھی۔ہتک عزت کی شکایت راہل کے اس بیان کو لے کر کی گئی جس میں انہوں نے مبینہ طور پر کہا تھا کہ ’کس طرح تمام چوروں کے نام میں مودی لفظ شامل ہے۔ بلند شہر کے رہنے والے جگدیپ کمار مودی نے پیر کو یہ شکایت داخل کی تھی۔انہوں نے کہا تھا کہ ایک ریلی کے دوران راہل کے تبصرے سے ان کے اور ان کے خاندان کی شبیہہ خراب ہوئی ہے کیونکہ بہت سے لوگوں نے ان کا مذاق اڑایا۔