بنگلورو،12؍مئی(ایس او  نیوز) نائب وزیر اعلیٰ ڈاکٹر جی پرمیشور نے خرابی ٔ صحت کے سبب ریسارٹ میں وزیراعلیٰ ایچ ڈی کمارسوامی کی طرف سے دو دن آرام کرنے کے فیصلے کابھرپور دفاع کیا۔ اخباری نمائندوں سے بات چیت کرتے ہوئے انہوں نے کہاکہ لوک سبھا انتخابات کی مہم کی تھکان کی وجہ سے کمار سوامی کو آرام کی ضرورت تھی ۔ ٹمکور میں اخباری نمائندوں سے بات چیت کرتے ہوئے انہوں نے کہاکہ انتخابی ضابطۂ اخلاق لاگو ہونے کے باوجود ریاستی حکومت کی طرف سے ترقیاتی کاموں پر پوری توجہ دی جارہی ہے، خشک سالی سے نپٹنے کا کوئی کام روکا نہیں گیا ہے۔ اسی لئے وزیر اعلیٰ اگر اپنی صحت کی خرابی کے سبب آرام کریں تو کسی کو کچھ اعتراض کیوں ہو؟۔ انہوں نے کہاکہ دو دن آرام کے بعد کمارسوامی صحت یاب ہوجائیں گے اور دوبارہ چنچولی اورکندگول اسمبلی حلقوں کی انتخابی مہم میں لگ جائیں گے۔ اور اس کے فوراً بعد ریاست کے انتظامیہ کی طرف مکمل توجہ دیں گے۔اسی لئے اس بات کو بتنگڑ بنانے کی کوئی ضرورت نہیں ۔