دبئی میں ایک سواری نے ایک شخص کو رونڈ ڈالا؛ مہلوک ایشیائی شخص کی شناخت ہنوز نہیں ہوپائی؛ پولس نے عوام سے کی تعاون کی اپیل
دبئی 13/اگست (ایس او نیوز) یہاں ایک سواری کی ٹکر میں ایک شخص ہلاک ہوگیا مگر اُس شخص کی شناخت ابھی تک معمہ بنی ہوئی ہے اور یہ کون ہے، کس ملک یا کس شہر سے ہے کچھ پتہ نہیں چل پایا ہے۔ پولس کا کہنا ہے کہ یہ ایشیاء کے کسی ملک سے تعلق رکھتا ہے۔
دبئی پولیس نے سڑک حادثے میں ہلاک ہونے والے اس ایشیائی شخص کا فوٹو جاری کرتے ہوئے عوام سے اپیل کی ہے کہ اگر اس کو کوئی پہچان سکتا ہوتو وہ متعلقہ پولیس اسٹیشن سے رابطہ کرے۔
خلیج ٹائمزمیں شائع فوٹو اور خبر کے مطابق اس ایشیائی باشندے کو کسی موٹر گاڑی نے 27 جولائی 2020کو لحباب علاقے میں حتّا اسٹریٹ پر روند ڈالاتھا اور اس کی موت واقع ہوگئی تھی۔ مگر چونکہ اس کے پاس سے کوئی شناختی دستاویز برآمد نہیں ہوئی اس لئے اس شخص کی پہچان نہیں ہوسکی ہے۔
یہ شخص متوسط جسمانی ساخت کا ہے اور چہرے پر ہلکی سی ڈاڑھی اور مونچھیں ہیں اور اس کے بال گہرے کالے ہیں۔ اس نے بیگی شرٹ اور بیگی پیٹ پہن رکھی تھی۔اس کی موت کے اسباب کا تعین کرنے کے لئے لاش فورنسک جانچ محکمہ میں بھیج دی گئی ہے۔
پولیس نے عوام سے اپیل کی ہے کہ اگر کسی کو اس شخص کے بارے میں کوئی تفصیل معلوم ہوتو لحباب پولیس اسٹیشن تک یہ بات پہنچائے۔ یاپھر 901 نمبر پر دبئی پولیس کال سینٹر سے رابطہ کرکے تفصیلات بتائیں۔