بھٹکل اور اطراف کے عوام توجہ دیں: دبئی اور امارات میں حادثات کے بڑھتے واقعات؛ ہندوستانی قونصل خانہ نے جاری کی سفری انشورنس کی ایڈوائزری
دبئی 26/جون (ایس او نیوز) دبئی سمیت متحدہ عرب امارات کے مختلف شہروں اور قصبوں میں مختلف حادثات میں شدید طور پر زخمی ہوکر اسپتالوں میں ایڈمٹ ہونے کی تعداد میں اضافہ کو دیکھتے ہوئے اور اسپتالوں میں اُن کا کوئی پرسان حال نہ ہونے کے واقعات کا مشاہدہ کرتے ہوئے ہندوستانی قونصل خانہ کی طرف سے عرب امارات میں سفر کرنے والے ہندوستانیوں کو ہدایات جاری کی گئی ہیں کہ وہ عرب امارات کا سفر کرنے سے پہلے انڈیا میں ہی اپنا سفری انشورنس کرائیں تاکہ دبئی یا کسی بھی اماراتی شہر میں خدانخواستہ وہ کسی حادثہ کا شکار ہوتے ہیں تو کم ازکم ایمرجنسی میں ان کے علاج معالجہ سمیت اُن کی واپسی کا مفت میں بندوبست کرایا جاسکے۔
انڈین کونسلیٹ کی طرف سے کہا گیا ہے کہ یہ ایڈوائزری اس لئے جاری کی گئی ہے کیونکہ عرب امارات میں میڈیکل کے اخراجات بے حد زیادہ ہیں اور دیکھا گیا ہے کہ جو ہندوستانی شدید زخمی حالت میں اسپتالوں میں ایڈمٹ ہیں، اُن کے اسپتال کے بل اتنے زیادہ ہیں کہ اُن کے دوست اور رشتہ دار بھی اُن کی بھرپائی کرنے سے قاصر ہیں۔
دبئی کے ایک انگریزی اخبار کے مطابق وزٹ ویزا پر دبئی یا امارات میں سفر کرنے والوں کے لئے 15دن کی ویزا پر 60 درہم دے کر یو اے ای کا سفری انشورنس کرایا جاسکتا ہے، اسی طرح ایک ماہ کی ویزا پر سو درہم اور تین ماہ کی ویزا پر تین سو درہم کا سفری انسورنس کرایا جاسکتا ہے۔ اسی طرح ہندوستان میں ٹکٹ بُکنگ کے ساتھ کم سے کم ہزار سے پندرہ سو انڈین روپئے زائد دے کر بھی سفری انشورنس کرایا جاسکتا ہے جو کسی بھی طرح کا حادثہ پیش آنے کی صورت میں ایمرجنسی علاج سمیت واپس انڈیا جانے یا امارات میں علاج ناکام ہوکر فوت ہوجانے کی صورت میں میت کو بھی انڈیا لے جانےتک کسی کو ایک پیسہ خرچ کرنے کی ضرورت نہیں پڑے گی۔
دبئی اور امارات میں بھٹکل اور اطراف کے کافی لوگ بھی رہائش پذیر ہیں اور سینکڑوں لوگ وزٹ ویزا پر دبئی آتے جاتے رہتے ہیں۔ ایسے میں بعض لوگ دبئی پہنچ کر حادثات کا شکار ہونے یا کسی بیماری میں مبتلا ہوکر اسپتالوں میں ایڈمٹ ہونے کے واقعات بھی پیش آئے ہیں ایسے میں دبئی اور امارات کے کسی بھی شہر میں اُن کا کوئی پرسان حال نہیں ہوتا اور اسپتالوں میں علاج کا بل اتنا زیادہ ہوتا ہے کہ صاحب حیثیت لوگوں سے مالی مدد لینی پڑتی ہے۔ دبئی میں مقیم بھٹکل کے ایک سماجی کارکن کا کہنا ہے کہ وزٹ ویزا پر آنے والے نوجوان یا کسی بھی عمر کا شخص اگر انڈیا میں ہی اپنا سفری انشورنس کرکے دبئی کا دورہ کرے تو وہ کسی پر بھی بوجھ نہیں بنے گا اور انشورنس کمپنی کی طرف سے ہی تمام اخراجات ادا ہوجائیں گے۔ اس تعلق سے انڈیا کے ٹکٹ ایجنٹوں یا ویزا بناکر دینے والوں سے انشورنس کے تعلق سے زائد معلومات لی جاسکتی ہے۔