ڈاکٹر کفیل خان اور ان کی بیوی نے پرینکا گاندھی سے کی ملاقات
لکھنؤ،21؍ستمبر(ایس او نیوز؍ایجنسی) حال ہی میں جیل سے رہا ہونےوالے ماہر امراض اطفال ڈاکٹر کفیل خان نے کانگریس جنرل سکریٹری پرینکا گاندھی واڈرا سے ان کے نئی دہلی واقع رہائش گاہ پر اپنے پریوار کے ساتھ ملاقات کی۔ ڈاکٹر کفیل خان کے ساتھ ان کی بیوی بھی موجود تھیں۔ ریاستی کانگریس نے پیر کو ملاقات کی تصویریں آفیشیل ٹوئٹر اکاونٹ پر شیئر کی ہیں۔
قابل ذکر ہے کہ شہریت(ترمیمی)قانون کے خلاف اشتعال انگیز تقریر کرنے کے الزام میں ڈاکٹر کفیل خان کو گرفتار کیا گیا تھا۔کانگریس کے اقلیتی سیل نے ان کی رہائی کے لئے بڑے پیمانے پر احتجاجی مہم چلائی تھی۔جیل سے رہا ہونے کےبعد پرینکا گاندھی نے فون کر کے ڈاکٹر کفیل اور ان کے کنبے سے بات چیت کر کے ان کا حال معلوم کیا تھا اور ہر ممکن تعاون کا بھروسہ دلایاتھا۔
پارٹی ذرائع کے مطابق ڈاکٹر کفیل اور ان کی بیوی نے کانگریس جنرل سکریٹری سے آج خوشگوار ماحول میں ملاقات کی۔ اس موقع پر ریاستی کانگریس کے صدر اجے کمار للو اور اقلیتی سیل کے چیئر مین شہنواز عالم بھی موجود تھے۔تقریباً ساڑھے سات مہینے متھرا جیل میں این ایس اے کے تحت بند رہے ڈاکٹر کفیل نے یو این ایچ آر سی کو خط لکھا تھا جس میں انہوں نے ہندوستان میں عالمی حقوق انسانی قوانین کی خلاف ورزی اور مخالفت کی آواز کو دبانے کے لئے این ایس اے کے غلط استعمال کی بات کہی تھی۔
