گلبرگہ میں جہیز ہراسانی سے متاثرہ خاتون کی آگ لگا کر دو بچوں کے ساتھ خودکشی
گلبرگہ،26؍اکتوبر(ایس او نیوز) ایک عورت نے پیر کے دن پنچ شیل نگر، جیورگی روڈ گلبرگہ میں اپنے مکان میں پنے آپ کو اور اپنے بچوں کو آگ لگادی جس کے نتیجہ میں یہ عورت اوراس کی ایک لڑکی جل کر ہلاک ہوگئے جب کہ اس عورت کا تین سالہ بچہ شدید جھلس گیا تھا اور اسے ہسپتال میں شریک کروادیا گیا تھا لیکن آج وہ بھی اپنے زخموں کی تاب نہ لاکرچل بسا۔
پولیس بیان کے بموجب26سالہ مذکورہ بالا خاتون دیکشا نے کوئی آگ لگانے والا سیال خود پر اور اپنے بچوں پر چھڑک کر آگ لگادی تھی جس کے سبب وہ اور اس کی دو سالہ لڑکی سنچنا جائے وقوع پر ہی ہلاک ہوگئے۔ تین سالہ لڑکا دھننجے کافی جھلس گیا وہ ہسپتال میں انتقال کرگیا۔
دیکشا کا تعلق موضع کالگی ضلع گلبرگہ سے ہے۔ پانچ سال قبل اس کی شادی پنچ شیلا نگر کے وسنت شرما کے ساتھ ہوئی تھی۔ ہلاک ہوجانے والی خاتون کے والدین کا کہنا ہے کہ ان کی بیٹی کو اس کے شوہر اور سسرالی رشتہ داران کی جانب سے جہیز کے لئے ہراساں کیا جاتا تھا۔ ذرائع کے مطابق اسے اپنے والدین کے گھر جانے کی بھی اجازت نہیں دی جاتی تھی۔ دیکشا کے والدین نے اسٹیشن بازار پولیس اسٹیشن میں اس کے شوہر اور سسرالی رشتہ داران کے خلاف شکایت درج کروادی ہے۔
