این آرسی اورشہریت ترمیمی بل ایک ہی سکہ کے دورخ،اپوزیشن پارٹیاں مخالفت کریں
ممتا بنرجی کاچیلنج،ہم بنگال میں سی اے بی کے نفاذ کی اجازت نہیں دیں گے
نئی دہلی،6 دسمبر (ایس او نیوز/آئی این ایس انڈیا) شہریت ترمیمی بل پیر کو لوک سبھا میں پیش کیا جائے گا، لیکن حزب اختلاف کی جانب سے اس کی سخت مخالفت کی جانے کاامکان ہے۔ مغربی بنگال کی وزیراعلیٰ ممتا بنرجی نے کہاہے کہ شہریت ترمیمی بل (سی اے بی) اورنیشنل رجسٹر آف سٹیزن(این آر سی) ایک ہی سکے کے دو رخ ہیں۔ ہم بنگال میں سی اے بی کے نفاذ کی اجازت نہیں دیں گے۔ ممتا بنرجی نے کہا کہ میں دوسری سیاسی جماعتوں سے گزارش کرتی ہوں کہ وہ سی اے بی کی حمایت نہ کریں۔ یہ بات قابل ذکر ہے کہ اس سے قبل آر جے ڈی نے بھی سی اے بی کی مخالفت کی تھی۔ راشٹریہ جنتا دل (آر جے ڈی) نے ایک ٹویٹ میں شہریت ترمیمی بل کی مخالفت کی تھی۔ پارٹی نے ایک کے بعد ایک ٹویٹ کرکے اس بل پر اعتراض کیا تھا اور شہریت میں ترمیمی بل کا موازنہ نوٹ بندی کے ساتھ کیا تھا۔ آر جے ڈی کی جانب سے لکھاگیاہے کہ جس طرح مودی سرکار نے نوٹ بندی کے ذریعہ نام نہاد کالے دھن سے نمٹنے کے لیے تمام تر ذمہ داری عوام پرعائد کردی ہے، اسی طرح این آرسی میں شہریوں پربھی یہ ذمہ داری اور دباؤ ڈالا گیا ہے۔ یہ ثابت کریں کہ کون کون شہری ہے، کون نہیں ہے۔