بھٹکل:23؍نومبر(ایس اؤ نیوز)قومی شاہراہ 66سے متصل زین لاڈج کے پڑوس میں کھلونوں کی  ایگزبیشن’’امیوز منٹ پارک‘‘ کو منظوری دینے سے نہ صرف شاہراہ پر ٹرافک کا مسئلہ ہورہا ہے  بلکہ شاہراہ کے فورلین کاکام بھی جاری ہےاور کووڈ-19کے چلتے یہاں سینکڑوں کی تعداد میں عوام ہجوم جمع ہوجاتے ہیں۔ ایگزی بیشن کو انتظامیہ کی جانب سے  منظوری دینے پر سخت اعتراض جتاتے ہوئے  میونسپل کونسلر اور  سماجی کارکن فیاض ملا سمیت    زرینہ عبدالباسط گولٹے نے بھی بھٹکل اسسٹنٹ کمشنر کو میمورنڈم  پیش کیا ہے۔

میمورنڈ م میں تحریر کیاگیاہے کہ شاہراہ پر 24گھنٹے ٹرافک رہتی ہے ، یہ علاقہ گنجان رہتاہے، دوسری طرف فورلین کا کام بھی چل رہاہے  اور کووڈ-19ابھی تک مکمل طور پر ختم نہیں ہواہے ایسے میں امیوزمنٹ پارک کو منظوری دینا خطرے سے خالی نہیں ۔ کہا گیا ہے کہ  وائرس دوبارہ پھیلا تو لینے کے دینے پڑسکتے ہیں۔کونسلرس نے  اسسٹنٹ کمشنر سمیت تحصیلدار کو بھی میمورنڈم سونپتے ہوئے   ایگزی بیشن کو اجازت دینے پر اعتراض جتایا ہے اور  مطالبہ کیا ہے کہ حالات کو دیکھتے ہوئے   متعلقہ جگہ پر ایکزی بیشن  لگانے سے منع کیا جائے۔

فیاض مُلا نے بتایا کہ ایک طرف  اسکولوں اور کالجوں میں کووڈ -19کو لے کر صحت عامہ کے افسران اور عملہ بار بار دورہ کرتے ہوئے بچوں کو اسکول نہ آنے کی پابندی لگارہے ہیں دوسری طرف عوامی ہجوم والے امیوز منٹ پارک کو منظوری دی جارہی ہے ، انہوں نے اس طرح کی مختلف پالیسی اپنانے پر کہا کہ ایسا کرنے پر  عوام الناس  سخت تذبذب کا شکار ہیں اور سوال کررہے ہیں کہ آیا صرف تعلیم گاہوں اور شادی بیاہ کے پروگراموں میں ہی سماجی فاصلے کو برقرار رکھنےسے کورونا سے راحت مل سکتی ہے،  کیا ایسے ایگزی بیشن میں سینکڑوں کی تعداد میں  عوامی ہجوم جمع ہونے سے کورونا کا کوئی خطرہ نہیں ہے ؟