کاروار14؍مارچ (ایس او نیوز) انتخابی ضابطۂ اخلاق لاگو ہونے کے بعدضلع شمالی کینرا میں سرکاری افسران کی نگرانی کا پہلا شکار ایک ایسا مسافر ہوگیا جو کے ایس آر ٹی سی بس میں سفر کرتے وقت اپنے ساتھ 5.83لاکھ روپے لے جارہاتھا اور اس کے پاس اس رقم کے تعلق سے کوئی ضروری دستاویز نہیں تھے۔

موصولہ رپورٹ کے مطابق مصدقہ اطلاع کی بنیاد پر ضلع سی سی بی اور پارلیمانی الیکشن کے فلائنگ اسکواڈ نے مشترکہ چھاپہ مارتے ہوئے بس میں سفر کررہے شخص کی تلاشی لی۔دراصل یہ کے ایس آر ٹی سی کی ہبلی انکولہ کاروار بس تھی اور جب یہ بس کاروار کے سینٹ مائیکل کانوینٹ کے قریب رکی تھی تو اس پر چھاپہ مارا گیا تھا۔تلاشی کے دوران بس میں موجودکاروار باڈ کے رہنے والے مسافر شری پرساد شیٹی کے پاس 5.83لاکھ روپے پائے گئے حالانکہ مہیش شیٹی نے بتایا کہ یہ رقم اس کی اپنی اور کسی بھی غیر قانونی طریقے سے اس کو حاصل نہیں کیا گیا ہے ، مگروہ اس کے بار ے میں کوئی ٹھوس ذریعہ یا ثبوت کے دستاویز پیش نہیں کرپایا۔اس لئے الیکشن فلائنگ اسکواڈ کے چیف بسواراج بڈییگیرنے وہ رقم ضبط کرتے ہوئے کہا کہ اس رقم کے قانونی اور محسوب ہونے کا جب کوئی ٹھوس ثبوت پیش کیا جائے گا تو پھر اس بارے میں اگلا اقدام کیا جائے گا۔