منگلورو16/جون (ایس او نیوز) بھٹکل اور اطراف سے کافی لوگ  علاج معالجہ کے لئے پڑوسی ضلع اُڈپی اور مینگلور کے اسپتالوں کا رُخ کرتے ہیں،  ان کے لئے  بری  خبر یہ ہے کہ کل  ڈاکٹروں کے احتجاج کے پیش نظر  مینگلور اور اُڈپی کے اسپتالوں میں باہری  مریضوں  کا علاج  نہیں ہوگا۔ کیونکہ  کولکتہ میں ڈیوٹی انجام دینے والے ڈاکٹروں پر جان لیوا حملے کے بعد جو ہڑتال جونیئر ڈاکٹروں نے شروع کررکھی ہے، اس کی حمایت میں انڈین میڈیکل ایسوسی ایشن نے کل یعنی 17/جون کی صبح 6بجے سے 18/جون کی صبح 6بجے تک اسپتالوں میں باہری مریضوں (او پی ڈی) کے لئے خدمات فراہم نہ کرنے کا فیصلہ کیا گیا ہے،  اسی پس منظر میں منگلورو اور اڈپی کے تمام اسپتالوں میں 17جون کی صبح سے 18جون کی صبح تک ڈاکٹروں کی ہڑتال رہے گی۔

 انڈین میڈیکل ایسو سی ایشن جنوبی کینرا یونٹ کے صدر ڈاکٹر سچیوا نندا رائے اور اڈپی یونٹ کے صدر ڈاکٹر گرومورتی نے بتایا کہ اسپتال میں داخل مریضوں اور ایمرجنسی معاملات میں ڈاکٹروں کی خدمات مریضوں کو فراہم کی جائیں گی۔ مگر پرائیویٹ میڈیکل کالجوں کے اسپتالوں کے علاوہ کے ایم سی منی پال  اور کارکلا کے اسپتالوں میں بیرونی مریضوں کے لئے خدمات معطل رہیں گی اوران اسپتالوں کی دواؤں کی دکانیں بھی بند رہیں گی۔