نئی دہلی، 23 اکتوبر (آئی این ایس انڈیا)دہلی پولیس کی کرائم برانچ نے مہنگی ادویات کے غلط استعمال پر ای ایس آئی ڈسپنسری کے ڈاکٹر سمیت پانچ افراد کو گرفتار کرلیا ہے جن کی شناخت   ڈاکٹر اویناش سینی، چندرپاکش (فارماسسٹ)، انکت مشرا (فارماسسٹ)، پروین منگلا اور سومیش راٹھی کی حیثیت سے کی گئی ہے۔

پروین منگلا اور سومیش راٹھی ڈسپنسری سے ادویات خریدتے تھے۔ ڈسپنسری میں مریضوں کو ادویات مفت دی جاتی ہیں جبکہ ڈاکٹر اویناش اور دونوں فارماسسٹ یہ ادویات فروخت کرتے تھے۔ یہ تمام ادویات زندگی بچانے والی دوائیں تھیں، جو بہت مہنگی ہیں۔ اویناش اور چندر پرکاش اوکھلا میں واقع ڈسپنسری میں کام کر رہے تھے، جبکہ انکت مشرا تگڑی میں ڈسپنسری میں کام کرتے تھے۔کرائم برانچ کے ڈی سی پی راجیش دیو نے بتایا کہ پولیس ٹیم کو اطلاع ملی تھی کہ کچھ لوگ مارکیٹ میں ای ایس آئی ڈسپنسری کی ادویات بیچ رہے ہیں۔ معلومات کی بنیاد پر انسپکٹر نریش سولنکی کی ٹیم نے دو افراد کو بدرپور کے علاقے سے ادویات کی خرید و فروخت کرتے ہوئے گرفتار کیا۔ ان کی شناخت چندر پرکاش اور پروین منگلا کے طور پر ہوئی۔ ان سے لاکھوں روپے مالیت کی ادویات ملی ہیں۔ جس پر ای ایس آئی ڈاک ٹکٹ تھا،تمام ادویات ای ایس آئی کارڈ ہولڈرز کو جاری کی گئیں ہیں۔