ڈی ایم کے کی مخالفت کے بعد ریلوے نے واپس لیا ہندی- انگلش بولنے والا سرکلر
چنئی، 14 جون(ایس او نیوز/آئی این ایس انڈیا) جنوبی ہند کی ریاست تمل ناڈو میں زبان تنازعہ ایک بار پھر اٹھ کھڑا ہوا ہے۔ڈی ایم کے نے جنوبی ریلوے کے اس حکم کے خلاف احتجاج ظاہر کیا ہے، جس میں ریلوے نے کہا تھا کہ کنٹرول روم اور اسٹیشن ماسٹر کے درمیان بات چیت کے دوران ہندی اور انگریزی زبان کا ہی استعمال کیا جائے۔ریلوے کے اس حکم کی ڈی ایم لیڈروں نے مخالفت کی ہے۔ڈی ایم لیڈروں نے اس بابت جنوبی ریلوے کے حکام سے ملاقات کی اور اپنا احتجاج ظاہر کیا ہے۔ڈی ایم رہنماؤں کے احتجاج کے بعد ریلوے نے صفائی دیتے ہوئے کہا ہے کہ ایسا حکم دینے کا مقصد صرف یہ تھا کہ زبان کی وجہ سے بات چیت کے دوران کسی طرح کی پریشانی نہ ہو۔ریلوے کی جانب سے جاری سرکلر میں کہا گیا تھا کہ اسٹیشن ماسٹروں کو کنٹرول آفس سے صرف انگریزی یا ہندی میں بات کرنی چاہئے،کسی بھی علاقائی زبان کا استعمال کرنے سے گریز کیا جانا چاہئے، تاکہ کسی بھی پارٹی کو سمجھ نہیں آنے کی صورت حال سے بچا جا سکے۔جنوبی ریلوے نے کہا تھا کہ کنٹرول آفس اور اسٹیشن ماسٹروں کے درمیان رابطے کو بہتر بنانا اس سرکلر کا مقصد ہے،تاہم ڈی ایم کے سمیت کئی جماعتوں کی مخالفت کی وجہ سے ایک نیا سرکلر جاری کرتے ہوئے ریلوے نے ہندی اور انگلش کی لازمیت کو ختم کر دیا ہے۔