بی جے پی کا حصہ بن چکی ہیں سرکاری ایجنسیاں:کنی موجھی
چنئی ،18؍ اپریل (ایس او نیوز) گزشتہ چند دنوں میں محکمہ انکم ٹیکس نے ملک کے مختلف حصوں میں چھاپہ ماری کی ہے۔حکام نے منگل کو ڈی ایم کے لیڈر کنی موجھی کے گھر پر چھاپہ ماری کی تھی۔رپورٹوں کے مطابق ان کے پاس سے بڑی مقدار میں نقد رقم جمع ہونے کی اطلاع ملی تھی،اسے لے کر کنی موجھی نے بھارتیہ جنتا پارٹی (بی جے پی) پر نشانہ لگایا ہے۔انہوں نے الزام لگایا ہے کہ ساری سرکاری ایجنسیاں بی جے پی کا حصہ بن گئی ہیں۔توتیکورن لوک سبھا سیٹ سے ڈی ایم کے امیدوار کنی موجھی نے کہا ہے کہ گزشتہ پانچ سال میں ہر سرکاری ایجنسی کا استحصال کیا جا چکا ہے،وہ بی جے پی کا حصہ ہو گئی ہیں،سی بی آئی،ای ڈی،آربی آئی ،الیکشن کمیشن سب کے ساتھ معاہدہ ہو چکا ہے،صرف اپوزیشن رہنماؤں کو نشانہ بنایا جا رہا ہے۔ ان سے پہلے ڈی ایم چیف ایم کے اسٹالن نے انتخابات سے 2 دن پہلے آئی ٹی کی چھاپہ ماری پر سوال اٹھایا تھا۔اسٹالن نے کہا تھا کہ پی ایم انتخابات کو متاثر کرنے کے لئے انکم ٹیکس حکام کا استعمال کر رہے ہیں۔بتا دیں کہ دوسرے مرحلے میں ریاست کی 39 لوک سبھا اور 18 اسمبلی سیٹوں کے لیے جمعرات کو انتخابات ہونے ہیں۔دوسرے مرحلے کے لئے چل رہی انتخابی مہم کے ختم ہونے کے بعد انکم ٹیکس حکام نے توتیکورن کے کرگی شہر واقع کنی موجھی کی رہائش گاہ پر چھاپے ماری کی۔