بنگلورو :4؍ستمبر(ایس اؤ نیوز/ایجنسی) کانگریس کے دگج لیڈر، سابق وزیر ڈی کے شیوکمار کو غیرقانونی طورپر رقم سپلائی کرنےکے الزام میں ای ڈی ڈپارٹمنٹ کی طرف سے گرفتار کئے جانےکے خلاف ریاست بھر میں سخت احتجاج اور برہمی کا اظہار کیا جارہاہے۔ کانگریس، جے ڈی ایس کارکنان سمیت ڈی کے شیوکمار ابھیمانی بلگا کے ممبران نے ریاست کے مختلف علاقوں میں راستہ پر اترکر اپنا احتجاج درج کیا ہے۔ اسی طرح انفورسمنٹ ڈائرکٹوریٹ کی طرف سے گرفتار ہوکر اسپتال میں زیر علاج سابق وزیر ڈی کے شیوکمار کی عیادت کے لئے پہنچے کانگریس لیڈران کو ملاقات سے روک دینے پر بھی سخت ناراضگی پائی جارہی ہے۔

ریاستی وزیر داخلہ کی پولس اعلیٰ افسران کے ساتھ میٹنگ :سابق وزیر کی گرفتار ی کے خلاف ریاست گیر سطح پر کانگریس کے احتجاج   کی وجہ سے بعض مقامات پر کشیدہ حالات ہیں۔ مرکزی حکومت کی مخالفت اور پالیسی کی مذمت کرتے ہوئے  کانگریس نے ریاست میں بند کا اعلان کیاہے۔ حالات کو دیکھتے ہوئے ریاستی وزیر داخلہ بسوراج بومائی نے پولس کے اعلیٰ افسران کے ساتھ میٹنگ کرتے ہوئے حالات کی جانکاری لی اور  احتجاجیوں سے اپیل کی کہ وہ پرامن احتجاج کریں۔

آگ میں جھلستا رام نگر : ڈی کے شیوکمار کی گرفتار ی ہوتے ہی ان کے حلقہ کنکا پورا میں حالات کشیدہ ہوگئے ہیں، ساتنور میں کانگریس کارکنان نے صبح سویرے سےہی قومی شاہراہ کو روک کر  احتجاج شروع کردیاہے۔ شاہراہ پر ٹائروں کو آگ لگا یاجارہاہے۔ کسی بھی سواری کو گزرنے نہیں دیا جارہاہے۔ بی جےپی کے خلاف نعرے بازی ہورہی ہے، کہا جارہا ہے کہ بی جےپی نفرت کی سیاست کررہی ہے، ای ڈی کے افسران مرکزی بی جےپی لیڈران کے ایجنٹ ہیں۔ ان کے مطابق  ڈی کے شیوکمار قانونی حدود میں جیت حاصل کریں گے۔

کنکا پورا میں کانگریس کے سخت احتجاج کے دوران کل 11کے ایس آرٹی سی بسوں کو نقصان پہنچاہے۔ جس میں ایک بس پوری طرح جل کر خاک ہوگئی ہے۔ تین بائک آگ کی نذر ہوگئی ہیں۔ ایک مقام پر گنیش مورتی سڑک پر رکھ کر احتجاج کیاگیا تو دیگر  جگہوں پر سرمنڈواتے ہوئے احتجاج کیاگیا۔   حالات کوکنٹرول کرنے خود آئی جی پی کنکاپوراپہنچ گئے ہیں۔ اور اس کے علاوہ  کل منعقد ہونے والے یوم ِ اساتذہ کے پروگرام کو رد کرتےہوئے محکمہ تعلیمات نے سرکلر جاری کیا ہے۔ جے ڈی ایس کے سابق وزیر جی ٹی دیوے گوڈا نے بھی افسوس کا اظہار کیا ہے۔

ضلع کے دوڈاہلی میں مرکزی وزیر داخلہ امیت شاہ کی نمائشی نعش کاجلوس نکالتے ہوئے احتجاج کیاگیا۔ سیاسی دشمنی کی وجہ سے انہیں گرفتار کئےجانے کی بات کہتے ہوئے احتجاجیوں نے مرکزی حکومت اور وزیر اعظم نریندر مودی کے خلاف نعرے لگائے۔

بنگلورو شہر کے چار مقامات پر ریاستی ریزرو پولس کے 10دستوں کو تعینات کیاگیاہے۔ اطلاع  کے مطابق ہر دستہ میں 30پولس اہل کار ہوتےہیں۔ پولس افسران رات بھر شہر کے مختلف مقامات پر گشت کرتےرہے۔ مرکزی حکومت کی جانچ ایجنسیاں آئی ٹی محکمہ ، انفورسمنٹ ڈائرکٹوریٹ اور سی بی آئی دفاتر پر زبردست پولس تعینات کی گئی ہے۔ میسورمیں کانگریس احتجاج کے دوران سابق وزیر اعلیٰ سدرامیا نے شرکت کرتےہوئے بی جےپی پر الزام لگایا کہ وہ  سیاسی نفرت اور دشمنی سےکام لے رہی ہے۔

ٹمکور ضلع کے کنیگل میں  بند:گرفتاری کی مذمت میں ٹمکور ضلع کنیگل شہر میں بند منایاگیا ۔ شہر کے اہم راستوں میں بائک ریلی کرتےہوئے کانگریسی کارکنان نے احتجاج کیا۔شہر میں  دکانیں بند تھیں البتہ کچھ دکانوں کو زبردستی بند کرنے اور دکانداروں پر حملہ کرنے کا الزام لگایاجارہاہے۔ شہری سطح پر اسکول اورکالجس بند تھے۔ کانگریس کارکنان نے ریاستی شاہراہ پر ٹائروں کو جلا کر اپنا اعتراض درج کرایا اور  بی جےپی پر دشمنی کی سیاست کرنےکا الزام لگایا۔

منگلورو میں دو بسوں پر پتھراؤ: شہر میں صبح سویرے دو پرائیویٹ بسوں پر پتھراؤ کرتے ہوئے نقصان پہنچایاگیاہے۔ شہر کے نندی گڈے کے قریب 27نمبروالی بس کو اور شہر اتھینا اسپتال کے قریب تلپاڑی روٹ پر چلنے والی پرائیویٹ بس پر پتھراؤ کیاگیا ہے۔ پولس نے  ڈی کے شیوکمار کی گرفتاری کی مخالفت میں پتھراؤ ہونے کا شبہ جتایا ہے۔

ریاست کے شمالی کرناٹکا کے مشہور شہر کلبرگی کے ڈاکٹر بابو جگ جیون رام مجسمہ کے سامنے سرکل پر راستہ روک کر کانگریس کارکنان نے  سخت احتجاج درج کرایا اور الزام لگایا کہ نریندرمودی کی قیادت والی حکومت کانگریس لیڈر، رکن اسمبلی ڈی کے شیوکمار کو ای ڈی ڈپارٹمنٹ کے ذریعے گرفتار کرایا ہے۔ احتجاج کے دوران وزیر اعظم نریندر مودی اور وزیر داخلہ امیت شاہ کے خلاف نعرے بازی کی گئی ۔ اس کے بعد ٹائروں کو آگ لگا کر اپنی برہمی کا اظہار کیا۔ اس موقع پر احتجاجیوں نے اپنی ناراضگی جتاتے ہوئے کہاکہ ڈی کے شیوکمار کو جانچ ایجنسیوں اور عدالتی نظام پر اعتماد ہے۔ ای ڈی کے سمن کا احترام کرتے ہوئے وہ پوچھ تاچھ کے لئے حاضر ہوئے ہیں ۔ اس کے باوجود انہیں گرفتارکیاجانا یہ ثابت کرتاہے کہ مخالف لیڈروں کو سیاسی طورپر ختم کرنے کی یہ سازش رچی جارہی ہے۔ احتجاج کی قیادت سابق وزیر شرن پرکاش پاٹل ، ضلع کانگریس صدر جگ دیو گتے دار، کانگریس لیڈران سبھا ش راتھوڑ کررہے تھے ۔

بنگلورو، میسور سمیت  بیلگام ضلع کے مختلف مقامات پر بھی کانگریس کارکنان نے سخت احتجاج درج کیاہے۔ بیلگام باگلکوٹ ریاستی شاہراہ روک کر بی جےپی کے خلاف اپنی برہمی کا اظہار کیا گیا ہے۔ زبردست بارش کےدوران ضلع کورگ کے مڈکیری سمیت  بلاری وغیرہ اضلاع میں بھی احتجاج درج کیاگیا ہے۔