بالآخر ڈی کے شیو کمار کو تہاڑ جیل بھیج دیا گیا ضمانت حاصل کرنے کی کوششوں کو جھٹکا، عرضی پر ہفتہ کو سماعت
بنگلورو،20؍ستمبر(ایس او نیوز) سابق ریاستی وزیر اور سینئر کانگریس لیڈر ڈی کے شیو کمار کو بالآخر تہاڑ جیل جانا ہی پڑا۔غیر قانونی رقم کی ضبطی کے معاملے میں انفورسمنٹ ڈائرکٹوریٹ کی طرف سے گرفتار شدہ ڈی کے شیو کمار کی طرف سے دہلی کی روز ایونیو عدالت میں دائر عرضی ضمانت کی سماعت کو دودن ٹال دئیے جانے کے سبب انہیں جمعرات کے روزہفتہ تک دہلی کی تہاڑ جیل بھیج دیا گیا۔شیو کمار کی عرضی ضمانت پر جج اجے کمار کوہر نے وکلاء کے مباحثے کی سماعت کی اورمعاملے کو ہفتہ کی صبح 11بجے تک ملتوی کردیا۔اس مرحلے میں انفورسمنٹ ڈائرکٹوریٹ کے وکیل نٹراج نے عدالت کو بتایا کہ شیو کمار نے 800کروڑ کی میراث کیسے حاصل کی اس کی مکمل جانچ باقی ہے اس لئے ان کو ضمانت نہیں ملنی چاہئے۔ انہوں نے کہا کہ اگر یہ دولت غیر قانونی طریقے سے حاصل کی گئی ہے تو یہ بھی ایک جرم ہے۔ انہوں نے کہا کہ ڈی کے شیو کمار کی مبینہ بدعنوانیوں کے متعلق دستاویزات کا انبار عدالت کے روبرو پیش کیا گیا ہے ان تمام کی جانچ کرنے میں ای ڈی کو وقت درکار ہے۔ اس موقع پر وکیل نے سابق وزیر داخلہ پی چدمبرم کیس کا حوالہ دیا اور کہا کہ انہیں بنیادوں پر ڈی کے شیو کمار کو بھی ضمانت نہیں دی جانی چاہئے۔انہوں نے کہا کہ ڈی کے شیو کمار پر جو الزامات ہیں انہیں وائٹ کالر جرائم کہا جاتا ہے۔ ان تمام کی جانچ صرف دستاویزات کی بنیاد پر ہی ممکن ہے۔ اس نوعیت کے معاملوں میں تحقیقاتی افسروں پر عدالتوں کو بندش نہیں لگانا چاہئے۔نٹراج نے کہا کہ شیو کمار کے بیرون ملک کے بینک میں کھاتے ہونے کا انکشاف ہوا ہے اس کی بھی جانچ باقی ہے۔ ساتھ ہی نوٹ بندی کے مرحلے میں کروڑوں روپیوں کا تبادلہ ہوا ہے۔ انہوں نے کہا کہ شیو کمار نے دستاویزات میں بتایا ہے کہ انہوں نے اپنی بیٹی ایشوریا کو 40کروڑ روپیوں کا قرضہ دیا ہے لیکن پوچھ گچھ کے دوران ایشوریا نے ایسے کسی قرضے سے لاعلمی کا اظہار کیا ہے۔ انہوں نے کہا کہ اگر یہ مان بھی لیا جائے کہ شیو کمار کا پیشہ زراعت ہے تو گزشتہ کئی برسوں سے ملک بھر کے کسان سنگین خسارے میں ہیں ایسے میں شیو کمار نے 161کروڑ کا منافع کیسے حاصل کیا اس کی جانچ باقی ہے۔ انہوں نے کہا کہ ڈی کے شیو کمار کے والد کیمپے گوڈا کی طرف سے قرض لینے کی دستاویز دی گئی ہے لیکن ان کی طرف سے کسی ٹیکس کی ادائیگی کی کوئی دستاویزموجود نہیں۔ ڈی کے شیو کمار کی ما ں گورما کے نام پر 38زرعی اثاثے رجسٹر ہیں، شیو کمار کے نام پر 24اثاثے ہیں ان کے بھائی ڈی کے سریش کے نام پر 27اثاثے ہیں وکیل نے دعویٰ کیا کہ ان تمام اثاثوں کی خریداری نقد ادائیگی کر کے کی گئی ہے جو غیر قانونی ہے۔ وکیل نے کہا کہ ڈی کے شیو کمار نے دو بینک کھاتوں سے 168کروڑروپیوں کا لین دین کیا ہے۔ باقی چار بینک کھاتوں کی ابھی جانچ ہونی باقی ہے۔ انہوں نے کہا کہ شیو کمار کے خلاف انسداد رقم جمع خوری قانون کے تحت مقدمہ جاری ہے اور اس قانون کے تحت اگر رقم کا ٹیکس ادا کر بھی دیا گیا تو کالا دھن جائز نہیں ہوجاتا اس کی بھی جانچ ضروری ہے۔ استغاثہ کے دلائل کو سننے کے بعد جج نے عرضی ضمانت کی سماعت دودن کے لئے ملتوی کرتے ہوئے شیو کمار کو تہاڑ جیل بھیجنے کا حکم دیا۔