بنگلورو، 29؍ستمبر (ایس او نیوز) بنگلورو ساؤتھ کے رکن پارلیمان تیجسوی سوریہ کے اس بیان پر کہ بنگلورو دہشت گردی کا مرکز بن گیا ہے، کے پی سی سی صدر ڈی کے شیوکمار نے شدید ناراضگی ظاہر کرتے ہوئے کہا کہ بنگلورو کو پورا ملک اور عالم دیکھ رہاہے، یہاں سے ساری دنیا میں انجینئر پھیلے ہیں، بنگلورو انفارمیشن ٹکنالوجی کا مرکز بن گیا ہے اور اس تعلق سے بنگلورو کو بدنام کرنا ٹھیک نہیں ہے۔

بنگلورو ساؤتھ کے رکن پارلیمان ہوتے ہوئے تیجسوی کو اپنے اس بیان پر عوام سے معافی مانگنی پڑےگی، واضح رہے کہ تیجسوی سوریہ نے اتوار کے دن کہا تھا کہ بنگلورو دہشت گردانہ سرگرمیوں کا مرکز بن گیا ہے اور انہوں نے مرکزی وزیر داخلہ امیت شاہ سے درخواست کی تھی کہ بنگلورو میں نیشنل انویسٹی گیشن  اتھارٹی (این آئی اے) کا مستقل مرکز قائم کیاجائے۔

سوریہ نے کہا تھا کہ دہشت گرد گروہ بنگلورو کو اپنی دہشت گردانہ سرگرمیوں کے افزائشی مرکز کے طور پر استعمال کرنا چاہتے ہیں۔ بنگلورو کو دہشت گردی کا مرکز کہنے والے تیجسوی سوریہ پر کئی لیڈروں نے اعتراض ظاہر کیا ہے اور کہا ہے کہ بنگلورو کو اس طرح بدنام کرنا اس کی ترقی کو روکنے کے برابر ہے، اگر بنگلورو کو ایسا کہا گیا تو یہاں کون آکر سرمایہ لگائے گا۔ڈی کے شیوکمار نے کہا کہ وزیر اعظم اور وزیر مالیات  کو چاہئے کہ وہ اس سوال کا جواب دیں۔ بنگلورو کی اہمیت کے بارے میں آنجہانی وزیر اعظم واجپائی نے کہا تھا کہ عالمی لیڈران پہلے بنگلورو کا دورہ کرنے کے بعد دہلی جاتے ہیں، لیکن تیجسوی نے بنگلورو کی اس قدر توہین کی ہے، یہ کنڑا باشندوں کے وقار کا مسئلہ  ہے، انہوں نے تیجسوی سوریہ کو چمکتا سورج نہیں  بلکہ گہن شدہ سورج قرار دیا۔

رکن اسمبلی سومیا ریڈی نے کہا کہ اپنے اغراض کے لئے بنگلورو کی اس طرح توہین کرنا ناقابل برداشت ہے۔ بنگلورو خوب صورت ملی جلی آبادی، تعلیم، آئی ٹی بی ٹی کا مرکز ہے، امن اور تحفظ والا شہر ہے۔ شہر کو اس طرح داغدار نہیں کرنا چاہئے۔ 

علاوہ ازیں وزیر اعلیٰ یڈیورپا نے سوریہ کے بیان پر اعتراضات کو نظر انداز کرتے ہوئے کہا کہ سوریہ نے صرف اتنا کہا تھا کہ حالیہ دنوں میں بنگلورو میں دہشت گردانہ سرگرمیاں بڑھ گئی ہیں۔ حکومت نے کئی سالوں سے بنگلورو میں این آئی اے ڈویژن قائم کرنے کی درخواست کی تھی، اس نئے ڈویژن سے دہشت گردانہ سرگرمیوں کو  روکنے میں مدد ملے گی۔ 

جے ڈی ایس کے سوشیل میڈیا انچارج پرتاب کنیگل نے بھی سوریہ پر شدید تنقید کی اور کہا کہ بنگلورو ساؤتھ کے لوگوں نے انہیں منتخب کیا تھا اب انہیں چاہئے کہ وہ ان کی حرکیتں دیکھیں۔ 

واضح رہے کہ ماضی میں تیجسوی سوریہ نے متعدد متنازعہ بیانات جاری کئے تھے، ایک دفعہ کہا تھا کہ پنجر لگانے والے لوگ آج سیاست میں حصے داری لینے چلے ہیں، اس وقت ان کے بیان پر اپوزیشن لیڈر سدارامیا سمیت دیگر لیڈروں نے سخت تنقید کی تھی۔