بھٹکل کا دِیاب کھروری دبئی کی سی بی ایس ای نیشنل فٹ بال ٹیم میں منتخب؛ نیشنل چمپن شپ میں حصہ لینے انڈیا روانہ
دبئی 3 / نومبر (ایس او نیوز) بھٹکل کے نوجوان جہاں دبئی اور گلف ممالک میں تعلیم کے میدان میں بازی ماررہے ہیں تو وہیں کھیل کے مقابلوں میں بھی بہترین پرفارمینس پیش کرتے ہوئے نہ صرف بھٹکل، بلکہ پورے ملک کا نام روشن کررہے ہیں۔ ان ہی میں سے ایک بھٹکل مسلم جماعت کے سابق جنرل سکریٹری جناب رحمت اللہ راہی کا فرزند دِیاب کھروری ہے جس نے حال ہی میں دبئی اور ابوظبی میں منعقدہ فٹ بال ٹورنامنٹ میں اتنی بہترین پرفارمینس پیش کی کہ اُسے سی بی ایس ای نیشنل فٹ بال کی انڈر 19 ٹیم میں منتخب کیا گیا ۔
17 سالہ دِیاب دبئی کے معروف Our Own High School (" او۔او۔ایچ ۔ایس دبئی ") میں بارہویں سائنس میں تعلیم حاصل کررہا ہے۔ بتایا گیا ہے کہ حال ہی میں ابوظبی میں منعقدہ اسکول لیول ٹورنامنٹ میں اس کے اسکول نے دیاب کے لگائے گئے دوشاندار گول کی مدد سے اول مقام حاصل کیا تھا، ا س ٹورنامنٹ میں جملہ30 ٹیموں نے حصہ لیا تھا۔ یہاں سے اس کی اسکول ٹیم نیشنل لیول ٹورنامنٹ کے لئے منتخب ہوئی ۔ مورخہ 2 نومبر سے سی بی ایس ای نیشنل فٹ بال چمپئن شپ انڈیا کے دہلی کے قریب واقع نوئیڈا میں کھیلا جارہاہے۔ اور دِیاب اس ٹورنامنٹ میں اپنی صلاحیتوں کا مظاہرہ کرنے اپنی اسکول ٹیم کے ساتھ نوئیڈا پہنچ چکا ہے۔
بتایا گیا ہے کہ صوبہ اُترپردیش کے نوئیڈا میں سی بی ایس ای کی 30 نیشنل ٹیمیں حصہ لے رہی ہیں اور" او۔او۔ایچ ۔ایس دبئی " کا پہلا میچ کل سنیچرمورخہ 4 نومبر کو پنجاب سی بی ایس ای ہائی اسکول کے ساتھ ہوگا۔ توقع کی جارہی ہے کہ دِیاب یہاں بھی بہترین پرفارمینس پیش کرتے ہوئے نہ صرف اپنے اسکول، بلکہ شہر بھٹکل اور ریاست کرناٹک کا بھی نام روشن کرے گا۔
دِیاب کے والد جناب رحمت اللہ راہی نے بتایا کہ دِیاب بچپن سے ہی فٹ بال کا بڑا شوقین ہے، بھٹکل میں بیفا ٹیم میں کھیلتے ہوئے وہ کئی ٹورنامنٹوں میں حصہ لے چکاہے، بیفا میں شامل رہتے ہوئے وہ مینگلور، ہبلی اور دھارواڑ میں بھی اپنے بہترین کھیل کا مظاہرہ پیش کرچکا ہے۔ وہ دبئی کی بیفا ٹیم میں بھی کافی سرگرم ہے۔
نوئیڈا میں 2 نومبر سے ٹورنامنٹ کا آغاز ہوچکا ہے، جبکہ ٹورنامنٹ کا فائنل مقابلہ 8 نومبر کو ہوگا۔ سنیچر کو دِیاب اپنی اسکول ٹیم کے ساتھ پہلے میچ میں حصہ لے گا، بھٹکل کے تمام شائقین اسپورٹس نے اس موقع پر دیاب کے ساتھ نیک تمنائوں کا اظہار کیا ہے ۔