کاروار:6؍جون (ایس اؤ نیوز)اترکنڑا ضلع نگراں کار وزیر شیو رام ہیبار نے کاروار کے ہیسکام دفتر روڈ پر تعمیر کردہ اور انکولہ میں بلدیہ کی زیر سرپرستی چلنے والی ’اندرا کینٹین ‘کا افتتاح کیا۔ اس کے بعدا نہوں نے خطاب کرتے ہوئے کہاکہ اندراکینٹین سے غریبوں کا فائدہ ہوگا اور انہیں اس کینٹین سے کم قیمت پر ناشتہ سمیت دوپہر اور رات کا کھانا دستیاب ہوگا۔ انہوں نے بلدیہ والوں سے کہاکہ ہوٹل میں صاف صفائی ، غذا کا معیار وغیرہ کی کڑی نگرانی رکھیں۔ اسی طرح انہوں نے مقامی سطح کے عوامی نمائندوں کو بھی اس طرف توجہ دینے کی بات کہی۔ انہوں نے بتایا کہ ہماری سرکار غریبوں کے حق میں جو منصوبہ جات ہیں اس کو جاری رکھے گی۔
بلدیہ افسران نے بتایا کہ 75لاکھ روپیوں کی عمارت میں 15لاکھ روپیوں کے مشین ہیں ، جہاں ترکاری کاٹنے سے لے کر ابالنے تک کا پورا کام خود مشینیں ہی انجام دیتی ہیں۔کاروار کی اندار کینٹین میں ہردن 500 لوگوں کو 5 اور 10روپئے میں کھانا تیار کیا جاتا ہے، اسی طرح انکولہ میں صبح کا ناشتہ ، دوپہرکاکھانا اور رات کا کھانا 200 لوگوں کے لئے تیار کیا جائے گا۔
اخبارنویسوں سے بات کرتے ہوئے شیورام ہیبار نے بتایا کہ کووڈ-19زندگی کا ایک حصہ ہے، اگلے دو تین برسوں تک لاک ڈاؤن کو جاری رکھنا ممکن نہیں ہے،ہم سب کو اس کا شعور حاصل کرنا ہے کہ ہماری جان کی ہمیں خود حفاظت کرنی ہے، سرکار ہرکام کو انجام دینا ممکنات میں سے نہیں ہے۔ اس موقع پر انہوں نے ڈی سی ، ایس پی اور ضلع پنچایت سی ای او کی ستائش کرتے ہوئے کہاکہ انہی کی وجہ سے ہمارے ضلع میں کورونا پر قابوپایاگیا ہے۔
اسکولوں اور کالجوں کی شروعات کو لےکر انہوں نے بتایا کہ کورونا کی وجہ سے ہمارے طلبا کا ایک سال ضائع ہوجاتاہے تو ہونے دیجئے لیکن ان کی زندگیوں سے کھیلنے حکومت تیار نہیں ہے۔ حالات سنگین ہیں کوئی قطعی فیصلہ لینا ممکن نہیں ہے ۔
اس موقع پر رکن اسمبلی روپالی نائک، ضلع پنچایت صدر جئے شری موگیر، ڈی سی ڈاکٹر ہریش کمار، ایس پی شیوپرکاش دیوراج ، سی ای اؤ محمد روشن ، بلدیہ افسر پریانگا، فاریسٹ افسر ڈاکٹر اجے وغیرہ موجود تھے۔