ریاست میں ڈینگو بخار سے عوام پریشان : جنوری سے ابھی تک 14757افراد ڈینگو میں مبتلا
بنگلورو:16؍نومبر(ایس اؤ نیوز) ریاست میں ڈینگو بخار کا ہنگامہ جاری ہے، محکمہ صحت اور خاندانی فلاح وبہبودی کے مطابق یکم جنوری سے ابھی تک 14757افراد ڈینگو میں مبتلا پائے گئے ہیں، جس سے پچھلے ایک دہے میں سب سے زیادہ ڈینگو معاملات امسال درج کئے گئے ہیں۔
گزشتہ برس اسی وقت 3357ڈینگو معاملات کا پتہ چلا تھا، بنگلورو کے بی بی ایم پی حدود میں ہی 698معاملات درج ہوئے تھے تو امسال ڈینگو کیسس میں چار گنا اضافہ ہواہے۔ بی بی ایم پی حدود میں امسال 8483افراد ڈینگو بخار سے جھوجھ رہے ہیں۔ سال 2014سے ڈینگو بخار میں مبتلا ہونےو الوں کی تعداد میں لگاتار اضافہ ہوتارہا، 2018میں کچھ حد تک اس پر روک لگائی گئی تھی لیکن امسال جنوری سے ہی ڈینگو عوام کے لئے پریشانی کا باعث بنی ہوئی ہے۔
گزشتہ ایک مہینےمیں ڈینگو بخار سے 5لوگوں کی موت واقع ہوئی ہے، 2476افراد بخار کا علاج کروائے ہیں، ہرسال بارش کم ہوتے ہی ڈینگو بخار بھی کم ہوجاتی تھی لیکن امسال وقفے وقفے سے بارش ہونے کےنتیجےمیں ڈینگو بخار سال بھر پریشان کرتی رہی ہے۔ اب یہ کنٹرول میں ہونے کی محکمہ کے افسران نے جانکاری دی ۔
ریاست میں سب سے زیادہ جن اضلاع میں ڈینگو بخار کاپتہ چلا ہے ان کی تفصیل کچھ اس طرح ہے۔ دکشن کنڑا -1425(4ہلاک )۔شیموگہ 545(1ہلاک )۔ ہاویری 358۔ چتردرگہ 278(1ہلاک )۔چامراج نگر 271۔ ڈاونگیرہ 266۔اُڈپی 249۔ رائچور 235۔کلبرگی 229۔کولار 212(ایک ہلاک )۔ یادگیری 196۔ چک مگلورو 190۔ دھارواڑ 188۔ ہاسن 189اورچک بلاپور میں 183 معاملات کا پتہ چلاہے۔ بنگلورو شہر میں دو افراد، رام نگر، وجئے پور، گدگ،منڈیا میں ایک ایک فرد ڈینگو بخار سے ہلاک ہوئے ہیں۔