بنگلورو میں سوکھی گندگی پروسیس کرنے والے مراکز کو ترقی: نائب وزیراعلیٰ پرمیشور
بنگلورو، یکم جون(ایس او نیوز) شہر میں روزانہ برآمد ہونے والے سوکھے کچرے کی پروسینگ کے لئے حکومت نے جو مراکز قائم کئے ہیں ان کو 4.75کروڑ روپیوں کی لاگت پر ترقی دی جائے گی۔ یہ بات آج نائب وزیراعلیٰ ڈاکٹر جی پرمیشور نے کہی۔ شہر کے یشونت پور میں قائم سوکھا کچرا یکجا کرنے کے نئے مرکز کا افتتاح کرنے کے بعد انہوں نے کہاکہ نگرو تھانہ منصوبے کے تحت 3.35کروڑ روپیوں کی لاگت پر جدید کاری کا کام شروع کیا جائے گا۔اس کے لئے نیدر لینڈ کی سوئپ اسمارٹ کمپنی کی طرف سے 1.40کروڑ روپے دئے جارہے ہیں اس رقم سے سوکھی گندگی پروسیس کرنے کے لئے قائم دس مراکز کو ترقی دی جائے گی۔ اور ساتھ ہی آنے والے دنوں میں پروسینگ کے بعد سوکھی گندگی کو قابل استعمال بنانے کے لئے مراکز قائم کئے جائیں گے۔ سوکھی گندگی سے برآمد ہونے والی 36اشیاء کی نشاندہی کی گئی ہے، جن کو دوبارہ استعمال کیا جاسکتاہے۔انہوں نے کہاکہ ایک مرکز میں روزانہ 1.2 ٹن سوکھے کچرے کی پروسیسنگ کی جاسکتی ہے، آنے والے دنوں میں اس مقدار کو تین سے چار ٹن تک لے جانے کا منصوبہ ہے۔ اس موقع پر میئر گنگامبیکے ملیکارجن، بی بی ایم پی کمشنر منجوناتھ پرساد اور دیگر اعلیٰ عہدیدار وغیرہ موجودتھے۔