بنگلورو،20/جنوری(ایس او  نیوز) ایسے مرحلے میں جب کہ تمام کی توجہات شہریت قانو ن، این آر سی اور این پی آر کی مخالفت کی طرف مرکوز ہیں ریاستی حکومت نے اس کا پورا فائدہ اٹھاتے ہوئے محکمہ اقلیتی بہبود کے سالانہ بجٹ میں سینکڑوں کروڑ روپے کی کٹوتی کردی اور اس رقم کو سیلاب زدگان کی امداد کے لئے استعمال کرلیا۔اس کے ساتھ ہی اگلے بجٹ کی تیاری کے مرحلے میں محکمہ اقلیتی بہبو د کے افسروں کو واضح طور پر بتا دیا گیا ہے کہ رواں سال بجٹ میں محکمہ کے لئے جتنی رقم مختص کی گئی ہے 2020-21کے بجٹ میں اس کا صرف 50فیصد یا اس سے بھی کم ہی مل سکے گی۔دیر سے یہ بات سامنے آئی ہے کہ ریاستی حکومت نے اقلیتوں کی معاشی ترقی کے لئے قائم کرناٹکا مائنارٹیز ڈیولپمنٹ کارپوریشن کے سالانہ بجٹ میں غیر معمولی کمی کردی ہے۔ اس کے لئے سابق وزیر اعلیٰ کمار سوامی نے بجٹ کے تحت 330کروڑ روپے کی رقم مختص کی تھی اس میں کمی لاتے ہوئے حکومت نے اب 120کروڑ روپے مقرر کیا ہے۔ حکومت کے اس اقدام سے کے ایم ڈی سی کی مختلف اسکیموں سے استفادہ کرنے والوں کی تعداد 67ہزار سے گھٹ کر 28ہزار تک پہنچ چکی ہے۔ یعنی سیدھے40ہزار اقلیتی مستحقین کو سرکاری سہولتوں سے محروم کردیا گیا ہے۔ جہاں تک اقلیتی ڈائرکٹوریٹ کا تعلق ہے اس کے بجٹ میں بھی زبردست کٹوتی کی گئی ہے۔ ڈائرکٹوریٹ میں بجٹ کی کمی کی صورتحال اس قدر سنگین ہے کہ اس کی وجہ سے ڈائرکٹوریٹ کی طرف سے چلائے جا رہے اقامتی اسکولوں اور ہاسٹلوں میں کھانے اور انفراسٹرکچر کی سہولتوں میں کمی کی گئی ہے۔ رواں سال اقلیتی ڈائرکٹوریٹ کو اس مقصد کے لئے دئیے گئے بجٹ کی رقم 1767کروڑ روپے تھی اس میں 101کروڑ روپے کم کر کے 1666کروڑ روپے کردیا گیا ۔اگلے سال کے بجٹ کی تیاری کے مرحلے میں جائزہ میٹنگ کے دوران ڈائرکٹوریٹ کی طرف سے مانگ کی گئی کہ رواں سال کے بجٹ میں کم از کم 25فیصد کا اضافہ کیا جائے لیکن اس ڈائرکٹوریٹ کے افسروں کو صاف بتادیا گیا ہے کہ 20-21کے لئے جو بجٹ جاری ہوگا وہ رواں سال کے بجٹ سے 50فیصد کم ہوگا۔ اس کے علاوہ ڈی ایڈ، جی این ایم اور نرسنگ کورس میں زیر تعلیم اقلیتی طلباء کو دی جانے والی رقم میں بھی زبردست کٹوتی کردی گئی ہے۔بی ایڈ اور ڈی ایڈ کے 7155طلباء کی اسکالر شپ کے لئے 2018-19کے بجٹ میں 17.88کروڑ روپے کی رقم مہیا کرائی گئی تھی جس کو موجودہ حکومت نے2019-20میں گھٹا کر 12کروڑ روپے کردیا۔ اب یہ بات سامنے آئی ہے کہ اس رقم کو بھی سیلاب زدگان کی امداد کے لئے موڑ دیا جائے۔اسی طرح بی ایڈ اور ڈی ایڈ کے طلباء کو دی جانے والے 25ہزا ر روپے اور نرسنگ کی طالبات کو دی جانے والی نقد رقم 35ہزار روپے کی ادائیگی کو بھی امسال روک دیا گیا۔ اس کے لئے بجٹ میں 5کروڑروپے کی رقم مختص تھی وہ بھی واپس لے لی گئی-