بنٹوال : پائپ لائن میں سوراخ بنا کر ڈیزل کی چوری ۔ کیس درج ہونے کے بعد ملزم ہوگیا فرار
بنٹوال، 31؍ جولائی (ایس او نیوز) بنٹوال کے مضافات اربی سوناڈو علاقے میں ایوان نامی ایک شخص کے ذریعے منگلورو ریفائنری اینڈ پیٹرولیم لمیٹیڈ (ایم آر پی ایل) کی پائپ لائن میں سوراخ بنا کر ڈیزل چوری کرنے اور زمین کے اندر سے ہی ڈیڑھ کلومیٹر دور پائپ بچھا کر ڈیزل اپنے گھر تک لے جانے کا معاملہ سامنے آیا ہے۔
بتایا جاتا ہے کہ ایم آر پی ایل کی اس پائپ لائن کے ذریعے یہ ڈیزل ہاسن کے لئے سپلائی کیا جا رہا تھا ۔ ایوان نامی شخص نے زمین کے اندر سے پاس ہونے والی اس پائپ لائن میں سوراخ کرنے کے بعد اس پر گیٹ والو لگایا اور ڈیڑھ کلو میٹر دوری تک چوری کا ڈیزل لے جانے کے لئے اپنی پائپ بچھا دی اور علاقے میں کسی کو بھی کانوں کان خبر نہیں ہوئی ۔ معلوم ہوا ہے کہ ایوان چوری کیا گیا پیٹرول اپنی جیپ گاڑی کے لئے استعمال کرنے کے علاوہ اسے فروخت بھی کیا کرتا تھا۔
ڈیزل چوری کا یہ معاملہ اس وقت سامنے آیا جب کمپنی نے محسوس کیا کہ سپلائی کیے جارہے ڈیزل کی مقدار میں بہت زیادہ فرق آنے لگا ہے تو پولیس کمشنر کے پاس اس کی شکایت کر دی گئی ۔ ساتھ ہی ساتھ کمپنی نے مخصوص آلات کی مدد سے پائپ کے راستے پر چیکنگ شروع کی تو اس مقام کی نشاندہی ہوگئی جہاں سے ڈیزل لیک ہورہا تھا ۔ اس کے بعد بنٹوال دیہی پولیس اسٹیشن میں شکایت درج کرواتے ہوئے جب اس مقام پر زمین کھودی گئی تو یہ حیران کن معاملہ دیکھنے کو ملا ۔
معلوم ہوا ہے کہ ایوان کو جب پتہ چلا کہ ڈیزل چوری معاملے میں پولیس اس کو تلاش کررہی ہے تو وہ فرار ہوگیا ۔ پولیس نے اس کی گرفتاری کے لئے جال بچھا دیا ہے ۔