بنگلورو، 2؍ جون (ایس او نیوز)پچھلے 8سالوں میں بے روزگاری کا مسئلہ کھڑاکرناہی بی جے پی حکومت کا سب سے بڑاکارنامہ رہاہے۔یہ بات کے پی سی سی کارگذار صدر وسابق رکن پارلیمان آر دھروانارائن نے کہی۔

انہوں نے یہاں شہر میں طلب کردہ اخباری کانفرنس سے خطا ب کرتے ہوئے کہاکہ 13جون کو منعقدہونے والے قانون ساز کونسل کے ساؤتھ گراجویٹس حلقے کے انتخابات میں ماہر تعلیم وبزرگ کسان لیڈر جی مادے گوڈ ا کے فرزند مدھوجی مادے گوڈابھی تعلیم یافتہ نوجوان ہیں اور ہزاروں بے روزگاروں کو روزگار فراہم کیاہے۔ڈگری یافتہ لوگوں کے مسائل حل کرنے میں مدھو مادے گوڈااہم کردار اداکریں گے۔ نوجوان ووٹروں سے گذارش ہے کہ ملک اور ریاست کی ترقی اور حفاظت کیلئے کانگریس امیدوار کی حمایت میں کام کریں۔

دھروانارائن نے کہاکہ کانگریس حکومت نے اپنے دور اقتدار میں نوجوان طبقے اور گراجویٹس کیلئے بہت سارے منصوبے جاری کئے ہیں۔چھٹے پے کمیشن کی سہولت فراہم کرکے 30فیصد ملازمین کی تنخواہوں میں اضافہ کیاہے۔من موہن سنگھ جس وقت وزیراعظم تھے،یوجی سی گرانٹ میں اضافہ کیاتھااور ملازموں کے مفادات کے تحفظ کیلئے ضروری اقدامات کئے تھے۔مگر بی جے پی نے جب اقتدار سنبھالاتھا اس وقت سالانہ دوکروڑافراد کو ملازمتیں فراہم کرنے تیقن دیاتھا،مگرافسوس کہ مودی حکومت پورے آٹھ سالوں میں 16لاکھ ملازمتیں فراہم نہیں کرسکی ہے۔اس کے برخلاف ملک میں بے روزگاری کا مسئلہ کھڑاکرکے بے روزگار بھارت بناکر چھوڑ دیاہے،یہی بی جے پی حکومت کا کارنامہ رہاہے۔اسی ماہ کی 13تاریخ کو منعقد ہورہے قانون ساز کونسل انتخابات میں بی جے پی کو کامیابی نہیں ملے گی، کیوں کہ ان کی پارٹی کے ایک اور فرد نے آزادامیدوار کے طورپر انتخابات میں حصہ لیاہے اور پچھلی مرتبہ اس حلقے سے کامیاب ہوئے مدھوسدن انتخابی سرگرمیوں سے دوری اختیار کئے ہوئے ہیں،اس کے تحت بی جے پی کو اس مرتبہ ووٹرس ضرور سبق سکھائیں گے۔

انہوں نے کہا کہ جے ڈی ایس کے سابق ایم ایل سی مری تبے گوڈا بھی جے ڈی ایس امیدوار کے خلاف کھلے عام مہم چلارہے ہیں اور انہوں نے الزام لگایاہے کہ پیسو ں کیلئے جے ڈی ایس نے ٹکٹ فروخت کردیاہے۔جے ڈی ایس میں بغاوت عام ہوچکی ہے۔دھروانارائن نے سی ایم ابراہیم اور کپل سبل کو موقع پرست سیاستدان قراردیتے ہوئے کہاکہ جس پارٹی نے انہیں مقام ومرتبہ دیا اسی پارٹی کے ساتھ دھوکہ کررہے ہیں،انہیں عوام کبھی معاف نہیں کریں گے۔

اس موقع پر ہنور کے رکن اسمبلی آر نریندرا، سابق رکن اسمبلی اے آر کرشنامورتی،ایس جینا،ضلع کانگریس کمیٹی کے صدر مری سوامی،بلاک کانگریس کمیٹی کے صد ر توٹیش،اپار کارپوریشن کے چیرمین شیوکماراور دیگر موجود تھے۔