دھون کی اننگز رائیگاں ، پہلا ٹی 20 آسٹریلیا کے نام
برسبین،21؍ نومبر (آئی این ایس انڈیا؍ایس او نیوز) شکھر دھون کی 76 رنز کی شاندار اننگز کے باوجود ہندوستان کو بارش سے متاثر پہلے ٹی 20 بین الاقوامی کرکٹ میچ میں بدھ کو یہاں آسٹریلیا سے ڈک ورتھ لوئیس سسٹم کے تحت چار رنز سے شکست جھیلنی پڑی۔آسٹریلیا نے جب 161501اوور میں تین وکٹ پر 153 رن بنائے تھے اس وقت بارش کی وجہ سے تقریبا ایک گھنٹے تک کھیل نہیں ہو سکا۔اس کے بعد میچ کو 17۔17 اوور کا کر دیا گیا۔آسٹریلیا نے مقررہ 17 اوورز میں چار وکٹ پر 158 رن بنائے لیکن ہندوستان کے سامنے ڈک ورتھ لوئیس سسٹم کے تحت 174 رن کا ہدف رکھا گیا۔دھون نے 42 گیندوں کی اپنی اننگز میں دس چوکے اور دو چھکے لگائے۔مڈل آرڈر لڑکھڑانے کے بعد دنیش کارتک (13 گیندوں پر 30) اور رشبھ پنت (15 گیندوں پر 20) نے پانچویں وکٹ کے لئے 51 رن جوڑے لیکن آخری اوور میں جب 13 رنز درکار تھے اس وقت دو وکٹ گنوانے کے بعد ہندوستان سات وکٹ پر 169 رنز تک ہی پہنچ سکااور اس طرح آسٹریلیا تین میچوں کی سیریز میں 1۔0 سے برتری بنانے میں کامیاب رہا۔آسٹریلیا کی جیت کے ہیرو مارکس اسٹونیس رہے جنہوں نے آخری اوور میں صرف آٹھ رن دیئے اور اس دوران پنڈیا اور کارتک کے وکٹ لئے۔اس سے پہلے انہوں نے 19 گیندوں پر ناٹ آوٹ 33 رن کی اہم اننگز بھی کھیلی۔ان کے علاوہ گلین میکسویل نے 25 گیندوں پر 46 رنز بنائے جس میں چار چھکے شامل ہیں۔کرس لن نے بھی چار چھکوں کی مدد سے 20 گیندوں پر 37 رن بنائے۔