بنگلورو ،24؍ اگست (ایس او  نیوز)”راجیہ سبھا کے حال ہی میں اختتام پذیر اجلاس میں جس طرح کے واقعات پیش آئے، میں نے ایک رکن پارلیمان کی حیثیت سے اپنے 30 سالہ دور میں ایسا کبھی نہیں دیکھا۔ ایسا پہلی بار ہوا ہے کہ عوام سے متعلق مسائل پر کوئی بحث ہو ہی نہیں سکی۔“ ان خیالات کا اظہار سابق وزیر اعظم ایچ ڈی دیوے گوڈا نے کل یہاں کیا۔ انہوں نے کہا کہ 11اگست کو پارلیمان کا مانسون اجلاس ختم ہونے کے بعد انہوں نے حزب اختلاف کے قائدین سے بات کی اور ان سے پوچھاکہ کسی بھی عوامی مسئلہ پر بحث نہ کرکے انہیں کیا مل گیا۔دیوے گوڈا نے کہا، ”مانسون اجلاس کے دوران حکمران اور حزب اختلاف ارکان کی جانب سے جو شور شرابہ کیا گیا اس کی وجہ سے مجھے بولنے کا موقع تک نہیں ملا۔ اس میں کوئی کام کاج نہیں ہوا اور پورا اجلاس بے کار گیا۔ مجھے بر سر اقتدار پارٹی کے ارکان کے ساتھ ساتھ اپوزیشن ارکان کے رویہ پر بھی بہت افسوس اور دکھ ہوا۔ چاہِ ایوان میں میز پرلوگوں نے رقص بھی کیا۔ ایک رکن پارلیمان کی حیثیت سے میرے 30سال مکمل ہوگئے ہیں۔ اس پوری مدت میں میں نے ایسا کبھی نہیں دیکھا۔ ایک سماج کے لئے اس طرح کے واقعات کسی بھی طرح مناسب نہیں ہیں کیوں کہ یہ جمہوری اقدار کے خلاف ہے۔ یہ ان لوگوں کی توہین کے مترادف ہے جنہوں نے ملک کی آزادی کے لئے جد وجہد کی۔“ دیوے گوڈا اتوار کو یہاں پارٹی صدر دفتر میں اخبار نویسوں سے بات کر رہے تھے۔ انہوں نے کہا کہ ان کی پارٹی 24ستمبر کو ریاستی لجسلیچر کا اجلاس ختم ہونے کے بعدآبی تنازعات کو حل کرنے کے لئے ریاست گیر مہم شروع کرے گی۔