بنگلورو،28/مئی(ایس او  نیوز) سابق وزیراعظم اور جے ڈی ایس کے قومی سربراہ ایچ ڈی دیوے گوڈا نے آج کے پی سی سی صدر دنیش گنڈوراؤ کو اپنی رہائش گاہ طلب کرکے انہیں آڑے ہاتھوں لیا اور واضح کردیا ہے کہ کانگریس یہ بتادے کہ وہ حکومت چلانے میں جے ڈی ایس کا ساتھ دیناچاہتی ہے یا نہیں اگر اس کا جواب نہیں تو جے ڈی ایس اپنا راستہ چننے کے لئے آزاد ہے۔ بتایاجاتاہے کہ پچھلے دو تین دنوں سے متعدد کانگریس اراکین اسمبلی کی بیان بازی برگشتہ سرگرمیوں اور مخلوط حکومت کے مستقبل کو لے کر اٹھائے جانے والے سوالات پر سابق وزیراعظم نے شدید برہمی کا اظہار کیا اور دنیش گنڈوراؤ کو آڑے ہاتھوں لیتے ہوئے کہاکہ کے پی سی سی صدر رہتے ہوئے وہ کیا کررہے ہیں، اپنی پارٹی کے لیڈروں کو اس طرح کے بیانات دینے سے روکتے کیوں نہیں۔ اس مرحلے میں جب دنیش گنڈوراؤ نے اس طرح کے بیانات کو روکنے کا تیقن دلایا تو دیوے گوڈانے کہاکہ کانگریس پارٹی کو اگر اقتدار کا حصہ بنے رہنے میں دلچسپی نہیں ہے تو وہ واضح کردے تو وہ کمار سوامی سے کہہ دیں گے کہ استعفیٰ دے کر گھر میں بیٹھ جائیں۔ ہر دن ایک نیا بیان، ایک نیا مسئلہ  حکومت بنانے کے بعد کانگریسیوں نے کمار سوامی کو اسی میں الجھا کر رکھ دیا ہے۔ مخلوط حکومت قائم ہونے کے بعد کمار سوامی نے ریاست کی ترقی کے لئے اپنے طریقے سے کئی منصوبے تیار کئے جن میں کسانوں کے قرضوں کی معافی وغیرہ شامل ہیں۔ لیکن ان پر عمل کرنے میں ہر بار کانگریس کے الگ الگ حلقوں کی طرف سے رکاوٹیں کھڑی کرنا، برگشتہ اراکین اسمبلی کا بار بار ریسارٹوں کی طرف رخ کرنا اور انہیں منانے کے لئے کبھی ریاستی اور کبھی مرکزی لیڈروں کا آنا اس سے عوام میں یہی تاثر قائم ہوگا کہ حکومت مستحکم نہیں ہے، اور ایسی حکومت ریاست کی ترقی کے لئے کچھ نہیں کرسکتی۔ وہ نہیں چاہتے کہ ان کے فرزند ایسی کمزور حکومت کی قیادت کریں جو اپنی ساری میعاد برگشتہ کانگریسیوں کے نخرے برداشت کرتے ہوئے گزار دے۔ دیوے گوڈا نے واضح طور پر دنیش گنڈوراؤ سے کہاکہ وہ اپنی پارٹی کے لیڈروں کو واضح طور پر ہدایت دیں کہ اگر انہیں اقتدار میں نہیں رہنا ہے تو جے ڈی ایس بھی اقتدار پر بنے رہنے کے لئے بے چین نہیں ہے، وہ بھی اقتدار چھوڑنے کے لئے ہمہ وقت تیار ہے۔