دیوے گوڑا بنگلورو نارتھ لوک سبھا حلقہ سے مقابلہ کریں
بنگلورو،17؍مارچ (ایس او نیوز) بنگلورو نارتھ لوک سبھا حلقے کے کانگریس اور جنتادل سیکولر قائدین نے جے ڈی ایس کے بانی ایچ ڈی دیوے گوڑا سے اس حلقہ سے مقابلہ کرنے کا مطالبہ کیا۔ دریں اثناء ٹمکور وحلقہ کے کانگریس قائدین نے مطالبہ کیا کہ یا تو دیوے گوڑا اس سیٹ سے مقابلہ کریں یا پھر یہ سیٹ پارٹی کو دی دیں۔
ٹمکورو کے قائدین کا دعویٰ ہے کہ اگر دیوے گوڑا یہاں سے مقابلہ کریں گے تو انہیں 3.5لاکھ ووٹوں کی برتری ملے گی جبکہ بنگلورو نارتھ کے قائدین نے دعویٰ کیا کہ اگر وہ اس حلقے سے مقابلہ کرتے ہیں تو انہیں 5لاکھ ووٹوں کی برتری حاصل ہوگی۔ کانگریس اور جے ڈی ایس جو بنگلورو نارتھ میں اسمبلی حلقوں کی نمائندگی کرتے ہیں، نے دیوے گوڑا کی جیت کو یقینی بنانے کی حکمت عملی پر تبادلہ خیال کیا۔
وزیر قانون اور پارلیمانی امور کرشنا بائیرے گوڑا نے کہا کہ چوں کہ حلقہ میں کانگریس اور جے ڈی ایس کے سات ارکان اسمبلی ہیں، دیوے گوڑا کی جیت مشکل نہیں ہوگی ۔ انہوں نے کہا کہ وہ دیوے گوڑا سے بنگلورو نارتھ سے مقابلہ کرنے کی اپیل کرتے ہیں۔ بنگلورو نارتھ کے آٹھ اسمبلی حلقوں میں پانچ (کے آر پورم ، نارائن پورہ ، یشونت پور ، ہیبل ، پلکیشی نگر) کانگریس کے پاس ، دسراہلی، مہالکشمی لے آؤٹ جے ڈی ایس کے پاس اور ملیشورم بی جے پی کے پاس ہے۔