بنگلورو،18؍مارچ(ایس او نیوز) جمہوری نظام میں18سال سے زائد عمر کے تمام افراد کو رائے دہی کا حق دیاگیاہے۔ ووٹنگ کے اس حق کو ہر صورت میں استعمال کریں۔ بلاکسی خوف وخدشہ کے پولنگ بوتھ پہنچیں اور ووٹنگ کریں۔ یہ باتیں ڈپٹی کمشنر والیکشن افسر بی ایم وجئے شندرا نے کہیں۔ شہر میں آج پلکیشی نگر کے رچرڈپارک کے قریب منعقدہ تیسری جنس کے افرادمیں رائے دہی کے بیداری پروگرام کا افتتاح کرتے ہوئے انہوں نے کہا کہ معاشرہ میں تیسری جنس (زنخوں)کو خصوصی مقام دیاگیاہے۔ زنخوں کو بھی رائے دہی کا حق فراہم کیاگیاہے۔ ووٹنگ کا حق دستوری طورپر18سال سے زائد عمر کے تمام افراد کو دیاگیاہے۔ عوامی نمائندوں کو انتخابات کے ذریعہ منتخب کئے جانے کے موقع پر پیسوں کے لالچ ودیگر کسی بھی ترغیبی جھانسہ میں آئے بغیر اپنے حق رائے دہی کا استعمال کریں۔ ووٹ قیمتی ہے۔ اس ووٹ کو فروخت نہ کریں، ووٹ کو پیسوں میں تولنے کی ہرگز کوشش نہ کریں ،نہ کسی امیدوار کے جھانسہ میں آئیں۔ ووٹ کو اخلاقی طورپر استعمال کریں ۔ ووٹر شناختی کارڈ رکھنے والے تمام افراد اپنا حق رائے دہی استعمال کرتے ہیں تو صحیح اور اچھے امیدوار کو منتخب کرنا ممکن ہوگا۔ یہی الیکشن کمیشن کا ہدف ونشانہ ہے۔ انہوں نے مزید کہا کہ پہلی مرتبہ لوک سبھا عام انتخابات میں ووٹر کی رائے دہی تفویض کرنے والے وی وی پیاٹ مشینوں کو استعمال کیاجارہاہے۔وی وی پیاٹ ووٹروں کے اعتماد ویقین کامنانہ کرنے کے معاملے میں معاون رول اداکررہے ہیں۔ الیکشن اے آر او افسر ڈاکٹر ایم جی شیونا نے کہا کہ معاون ریٹرننگ افسر مرد وخواتین سمیت تیسری جنس (زنخوں) کو بھی رائے دہی کا حق دیاگیاہے۔ زنخوں میں اس حق کے تئیں بیداری لانے کے مقصدسے آج یہ بیداری پروگرام ترتیب دیاگیاہے۔الیکٹرانک ووٹنگ مشین(ای وی ایم) میں ووٹ کیسے ڈالاجاتا ہے۔ اس بارے میں یہاں تفصیلی طورپر معلومات فراہم کی گئی ہیں۔ انہوں نے کہا کہ لوک سبھا انتخابات میں رائے دہی کے فیصد میں اضافہ کرنے کے مقصدسے الیکشن کمیشن کی جانب سے بہت سارے عوامی بیداری پروگرام منعقد کئے جارہے ہیں۔ پلکیشی نگر کے اے سی سہیل احمد نے کہا کہ پلکیشی نگر کی مضافات میں69 افراد تیسری جنس سے تعلق رکھتے ہیں۔ یہ طبقہ معاشی وسماجی طورپر ترقی کرے۔ اس مقصد کے تحت کئی پروگرام چلائے جارہے ہیں، انہیں میں سے ایک حق رائے دہی کا بیداری پروگرام چلایا جارہاہے۔ زنخوں کو چاہئے کہ وہ رائے دہی کے استعمال کے ذریعہ اہم دھارے میں آنے کی کوشش کریں۔ اس موقع پر خصوصی توجہ کے حامل (معذور)افراد اور زنخوں کو تمثیلی طورپر ووٹنگ اور وی وی پیاٹ سے متعلق معلومات فراہم کی گئیں۔