کاروار:23؍اگست (ایس اؤ نیوز)مرکزی اور ریاستی حکومتوں کے موظف ملازمین کی پنشن کے متعلق جتنےبھی مسائل ہیں انہیں فوری حل کرنےکی ضلع ڈپٹی کمشنر ڈاکٹر ہریش کمار نے ہدایات جاری کی ہیں۔
ڈی سی دفتر میں جمعہ کو پنشن معاملات ، مسائل اور حل کے متعلق منعقدہ موظف سرکاری ملازمین پنشن عدالت کا افتتاح کرنےکے بعد وہ خطاب کررہے تھے۔ ڈی سی نےکہاکہ پنشن کو لےکر بعض پیچیدگیاں اور پرانے مسائل ہیں، وظیفہ یاب ملازمین کے حق کاتحفظ اہم ہے، اس سلسلےمیں پنشن والوں کے مسائل کو جلدی حل کرنےمتعلقہ افسران کو ہدایات جاری کیں۔
پنشن عدالت میں کل 49عرضیاں درج ہوئی تھیں۔ ڈی سی نے سبھی پنشن ملازمین کے مسائل و شکایات کی سماعت کرنے کے بعد چند معاملات کو وہیں حل کردیا۔ ڈائس پر اراضی ترقی بینک کے چیف مینجر ایم پنجار، کارگزار خزانہ افسر واسنتی مالونکر، محکمہ پنشن کے معاون ڈائرکٹر ایم آر نائک موجود تھے۔ پنشن عدالت میں پنشن ادا کرنے والے تمام بینکوں کے مینجرس ، موظف پنشن ملازمین سنگھ کے عہدیداران اور وظیفہ یاب ملازمین شریک تھے۔